Vawiin khan Lawngtlai Bawrhsap hovin DC Office Chamber-ah Bangladesh rama sentut ( Measles) leng mek laka kan lo fihlim theih nan a inven dan leh lo inralrin dan tur chungchang ngaihtuahin an thukhawm.
Pu Donny Lalruatsanga chuan Sentût vangin Bangladesh ah tun thlengin nunna za aia tam chân a ni tawh tih sawiin, lo inralrin leh tih tur tul ang angte lo tih lâwk chu hna hmasa neih a ngai hle a ni, a ti a. Lawngtlai District chu Bangladesh nen a ramri nei a nih angin hri lo lut thei reng a nih thu sawiin, Medical Team bakah District mipuite lo in ralrin a tul tiin, fimkhur turin a chah
Bawrhsap chuan ramri a awm khuate an fimkhur zual a tul hle tih tarlangin, fimkhur kawngah khawtlang hruaitute theihtawp lo chhuah turin a ngen a. Khawsik, hritlâng awmna- hnaptui tla, leh mit sen, taksa a sena bawl chu a lanchhuana ber a nih angin hetiang natna vei an awm chuan a rang lama in entir turin a chah
Dr. Lalmuanawma Jongte, Sr. Chief Medical Officer, chuan Vaccine lak that chu invenna tha ber a nih thu sawiin, 95% aia tam MR Vaccine la ngei tura hmalak a tul a ti. Vaccine chu naupang (9-12 months) leh (16- 24 Months) hnenah pek thin a ni a, dose hnih pek thin a ni a ti. Sentút chu Measles Virus - in a thlen thin tih sawiin, boruakah a leng thei a ni a, fimkhur a tul hle a ni a ti.
Dr. Lalhlimpuii, WHO chuan an hmalak dan tlangpui sawiin, Lawngtlai District - ah nikum January leh February thlaah Sentût a lo puang ve tawh tih sawiin, theihtawp chhuah a ni a, nunna chân an awm lo a ni, a ti. Vaccine- la kimlo an awm thin tih sawiin, chak zawka hmalak mek a nih thu a sawi a. Kumin bikah sentût vei an awm lo niin a sawi.