LADC Day chu LADC Hall ah Pathian hnena lawmthu sawichungin hman a ni.

Vawiin khan Lai Autonomous District Council in Kum 54 a tlin ,LADC Day chu LADC Hall ah Pathian hnena lawmthu sawichungin hman a ni.

LADC a Chief Executive Member, Pu C.Lalsawmzuala chuan LADC Day ah ram mipuite duhsakna hlanin chibai a buk a, LADC a awmtheih nana sulsutu zawng zawngte zahna chibai a buk bawk.

CEM chuan Laifate hian Pathian tihloh chu hmangaihtu tak tak a neilo tih sawiin, a chhunga chengten hmangaihna nen kan enkawl a ngaia, mahni intodelh leh hmasawn zawnga kalphung kan hrerem a pawimawh tih sawiin, LADC vanga hamthatna kan neih zawng zawngte hi LADC kan hmangaihna tizualtu ah hman a pawimawh a ti.

LADC a Chairman Pu C.Lalmuanthanga chuan Lalpan mahni a ro inrel theiin Laifate a siama, he rorelna hi a zahawma, Lalpan minpek hi a petu zahtak chunga kan enkawl a pawimawh a ti.

LADC Day ah hian Lalpan LADC a din vanga lawmthu sawiin , thawktu leh roreltute Pathian hnen ah hlan tharin, Pathian malsawm dilin tawngtai rual a ni.

Kum 1972 ah Mizo District Council, Union Territory ah hmankai a nih khan ,Mizoram chhimlama Pawi Lakher Regional Council chu District Council pathum, Lai, Mara leh Chakma District Council ah then niin, kumtin April 29 chu LADC Day atan hman thin a ni.

LADC Day ah Lawngtlai Bawrhsap Pu Donny Lalruatsanga leh Lawngtlai West bialtu MLA Pu C.Ngunlianchunga ten LADC leh ram mipuite Social media kaltlangin duhsakna an hlan.