Auto Rickshaw Driver rinawm, a Auto Rickshaw a pawisa tamtak theihnghilh, a neitu hnena kimtaka pelettu, Henry Lalhmingmuana, S/O Laltawmliana Lawngtlai-III chu vawiin khan Lawngtlai DC Office chuan Chawimawina thuziak leh Pawisa fai an hlan.
Henry Lalhmingmuana chawimawina hlanna hi DC Office Chamber ah neih niin, Lawngtlai DC, Pu Donny Lalruatsanga chuan Lawngtlai District chhungah mirinawm, Chief Minister Chawimawina Nopui dawng thei an nei chu chhuanawm a tih thu sawiin, Henry Lalhmingmuana rinawmna chuan Lawngtlai District mai nilovin, Mizote chhuanawm leh mawi zawngin rampumah a than phah a ti a, Lawngtlai DC Office chuan Henry Lalhmingmuana rinawmna chu a ngaihluin a chhuang takzet a ni, a ti.
Henry Lalhmingmuana chuan DC Office in a beisei leh rinphaklohva chawimawina an hlan chu lawmawm a tih thu a sawi a, khami tum, a Auto Rickshaw a pawisa an theihnghilh chauh kha nilovin, tumdangah pawh a passenger ten theihnghilh an neihin a theih ang angin a zawnchhuah thin thu a sawi.
Kum kalta 2025 June 19 zan khan Henry Lalhmingmuana hian Bazar Veng Lawngtlai atangin zan dar 9 vel ah Rakhine lam mi, sumdawng chu Hotel Husop, Assam Rifle Camp bul, Lawngtlai-III ah thlahin, a passenger hian pawisa a theihnghilh tih Henry-a hian In a thlen hnua a Lirthei a enfelna ah a hmua, a tuamna Polythene chu a tet vangin pawisa a ni tih a hre nghalin, a neitu a zawng chhuaka, kimtakin a pelet. Hemi tuma pawisa theihnghilh, himtaka peklet hi a vaiin Cheng Nuai 15 leh Sing 5 a ni.