Lawngtlai Bawrhsap Pu Donny Lalruatsanga chuan District hmasawnna hna thawhna tura ruahman District Transformation Scheme chungchang ah vawiin khan Chanchinbumite a kawm.
Bawrhsap chuan State Sorkar chuan Mizorama District tin chu kumkhat atan Cheng Nuai 100, hmasawnna hna thawh nan District Transformation Scheme hnuaiah a ruahman tih sawiin, he Scheme hnuaiah hian Lawngtlai District chuan Plan mumal tak siamin, thuneituten Project an siamte pawmin, hnathawhna tur pawisa pawh an dawn tawh thu a sawi.
Bawrhsap chuan Nuai 100 atangin Nuai 10 chu hnathawhna vil nan leh tul pawimawh danga hmantur niin, Nuai 90 chu hna hrang hrang, hmasawnna lam hawi atana ruahmana hman tur a ni a ti a, tuntumah hian Project pakua pawm niin, heng zing ah hian Bawlhhlawh paihna Motor pahnih leina tur Cheng Nuai 30 pawh a tel a, heibak ah hian Lawngtlai khawpui chhung cheina turte, Mobile Medical Unit atana hmantur Lirthei leina turte, Lairam Nursing School tih changtlunna turte chu a langsar zingah a tel.
Bawrhsap chuan tuntum ah hian UD&PA, Horticulture, Medical leh Education lam chu Department anga Project a tel an nih thu a sawi a, a tahtawlin Department dang pawh telh chhoh tum a nih thu a sawi a, he Scheme hnuaiah hian Department in hamthatna an hmuh na tur ngawr ngawr chu telh a remloh thu leh mipuiin an chhawr tangkaitur chu ngaihpawimawh a ni a ti a, hna chu DC Office atanga vila, thawhtur niin, hna an thawhthat chuan he Scheme hnuaiah hian hmasawnna hna thawhna tur dang pawh hmuh chhunzawm theih a ni dawn niin Bawrhsap chuan a sawi.