Laifate Kut ngaihhlut ber Hlukhla Kut Ni hnihna chu vawiin khan Central YLA Playground, Lawngtlai ah Lai Autonomous District Council a Chairman, Pu C.Lalmuanthanga Kut Pa hovin chhunzawm a ni.
Kut Pa, LADC Chairman chuan mipuite Hlukhla Kut chibai bukin duhsakna a hlan a, Laidate chu India, Myanmar leh Bangladesh ah te thenhran ni mahse, thisen a inzawmna chu khawvel ramri then chuan a tidanglam tak tak theilo a ti a, khawi hmunah pawh awm mah ila, hnam ziarang leh nungphung vawnhim kawngah tanla zual ila, chu chu Lai Hnam in malsawmna a dawnna leh a ropui zualzelna tur a ni a ti.
Pu C.Lalmuanthanga chuan Khawvel hmasawnna thang chho mek ah, mahni Hnam ziarang kalsan zawnga hmasawnna kalpui a nih chuan hnamin ral hun a hlatlo tihna a ni a, Lai Hnam ziarang leh tihdanphungte, Lai Tawng leh hnam rohlute vawnhim kawngah theihtawp chhuahturin ram mipuite a sawm.
Hlukhla Kut ah hian tualchhung zaithiam leh Zoram khawvel huapa zailama mi langsar ten kalkhawmte an awi a, Hnam lam leh ziarang tilangthei te entir niin, Hnam infiamna Lai Paih intihsiakna neih a ni bawk.
Tags
News