Vawiin khan LADC CEM Conference Hall-ah Pu C. Lalsawmzuala, CEM LADC hoin Village Level Parking Management Committee (VLPMC) meeting neih a ni a, Roadside Overnight Parking fees lak dan tur leh kalpui dan tur ruahmanna hrang hrangte sawiho a ni.
CEM, Pu C. Lalsawmzuala chuan ram hmasawnna tura thil thar leh chhinchhiah tlak kalpui a nih dawn vangin, a tir atangin a felfai nghal veklo mai thei a, harsatna leh sawiselna a awm pawha dawhthei taka hma la tur leh, ram leh hnam hmel lanna tur a nih anga theihtawp chhuah tlang turin member-te a sawm.
Pu HC. Vanlalruatpuia, Transport Officer & Secretary (VLPMC) chuan ruahmanna awmsate leh hmalakna hrang hrang report a pe.
Meeting chuan April, 30.2026 zing dar sarih ah a hawnna neih tha an ti a, Parking fee khawn tlin atangin 40% chu VLPMC in a chang anga, a bak 60% chu LADC-ah chhun luh thin a ni ang. Park phal lohna hmun a, park an awmin, penalty chawitir theih a ni ang. Parking fee aia alet a tam zel chawitir tur a ni.(Rs.250=500)
Motor chi hrang hrangte tana zan khat riah leh thla tina parking fee chawi tur bituk niin, HMV / Pick-up Above Zan khat : Rs 500/- Thla khat Rs 2,500/- LMV & Three Wheeler Zan khat Rs 250/- Thla khat Rs 1,500/- Two Wheelers Zan khat : Rs 150/- Thla khat Rs 1,000/-
He meeting-ah hian Pu JB. Vanhoy, EM (Transport), Pu K. Lalthanzara, Executive Secretary leh Central YLA hruaitute an tel.