Lawngtlai West MLA, Pu C.Ngunlianchunga chuan Autonomous District Council te chu teitet zel an nih chuan reilote ah a ral mai a hlauhthawn thu a sawi.
Tukin khan Thingkah a YLA Information House a hawnna ah Lawngtlai West bialtu MLA chuan YLA Day ah Thingkah Branch YLA ten Information House thatak hawntheiha an peihfel chu lawmawm a tih thu a sawi a
Pu C.Ngunlianchunga chuan tunlai hian Mizorama Autonomous District Council dinhmun her danglam tuma hmalakna a awm tih sawiin, Autonomous District Council te chu tiliana, thuneihna sangzawk pek aiin, tuna a dinhmun hi sawrzima, teitet hret hret tuma hmalak a ni a ti a, hetiangzela Autonomous District Council dinhmun teitet a nih chuan, reilote ah Hnam anga thuneihna leh rorelna hran neite hian ral hun an neih mai a hlauhthawn thu a sawi.
Pu C.Ngunlianchunga chuan District Council Sorkar, Politician leh mipuiten Autonomous District Council hlutna hrethara, dinhmun sang zawk a luahtheih nan duhsak tlaka inherrem tul a tih thu a sawi.
Pu C.Ngunlianchunga chuan Laifate chu hnam tlemte an nih vangin, Ruihhlo hmanga tihchhiat tham an nilo tih sawiin, Ruihhlo zuartute chu Lairam dinhmun thlir chungin Lairam ah Ruihhlo zuarlo turin a chah a, Ruihhlo chu theihtawp chhuah a do ngat ngat a tul thu sawiin, helam hawia YLA hmalakna fakawm a tih thu a sawi bawk.
Thingkah Branch YLA Information House, Lawngtlai West MLA in a hawn tak hi a dung feet 30, a vang feet 18 niin, Mizoram State Sport Council, Lawngtlai West MLA Fund leh MDC Fund hmangin Cheng Nuai 7 sing 5 senga sak niin, hnatlang tha 500 chuang sen a ni bawk.
Thingkah Branch YLA, Information House hawnna ah hian bialtu MDC Pu LR Dingliana Chinzah leh Central YLA Office Bearer te pawh telin, sawmbik engemawzat an tel bawk.
Tags
News