Karleh thawhlehni September 2 thleng awhtur Lai Autonomous District Council, Budget Session chu vawiin khan LADC Session Hall, Lawngtlai ah, Chairman Pu VL Hmuaka kaihhruaina hnuai ah tan a ni.
Vawiin Session ah Chief Executive Member Pu N.Zangura'm kum 2025-2026 LADC sum hmantura ruahman leh sum hmunna tur te House ah a pharh a, CEM chuan kum 2025-2026 chhung a LADC Budget atan ruahmanzat chu Cheng Nuai 26,355.07 a ni tih sawiin, Chhiah tlingkhawm atanga hmuh beisei cheng Nuai 421 a nih thu a sawi a, Budget pumpui atangin Cheng Nuai 21,202.50 chu thawktu hlawh a hmantur a nih thu a sawi.
Pu N.Zangura chuan Chhiah tlingkhawm atanga pawisa hmuh thinte chu tangkai takin hman a nih thin thu sawiin, Budget thar ah Nuai 421 hmuh beisiei pawh mipui, chhiah pe thinte leh thawktute vangin an beiseizat an tlin ngei a beisei tih a sawi a, kum kalta aiin Budget punna chu cheng nuai 1392.36 a ni tih sawiin Mizoram Sorkar chungah lawmthu a sawi.
Vawiin Session ah hian Eptu lam ZPM Legislature Party hruaitu, Opposition Leader Pu V.Zirsanga chuan Session koh a nihdan ah LADC dan palzutna a awm tih sawiin, inhnial buaina thleng kar ah Chairman chuan Session hi karleh Thawhtanni a chhunzawm turin a titawp.
Tags
News