LADC & CADC Boundary Study Team ten Parva an tlawh.

Nimin June 12 (Zirtawpni) khan Lai Autonomous District Council  leh Chakma Autonomous District Council  ramri chungchangah pawmdan inanglo enfiahtura Sorkarin a din LADC & CADC Boundary Study Team te chuan an Chairman   Pu Lalhmunsanga Hnamte , Secretary, DC&MA hovin Parva an tlawh.

Kumin February 13 khan Central Young Lai Association chuan Pi leh Pute hunlai atang tawhin Tuichawnglui chu LADC leh CADC inrina, Khuavangri khamsa a ni tiin Parva-I bul ah Ramri Lung an phuna, heihi CADC a Tlawmngaipawl, Zirlai pawl leh Political Party hrang hrang ten dodalin, Governor hnen ah Central YLA in Ramrilung an phun chu phawi turin an ngen a,  tuna ramri atan hmanmek chu ramri diktak a nih thu leh  tihdanglam an duhloh thu an thlen a, hemi thu kalzel ah hian nimin khan Sorkar chuan ramri enfiah tur hian a hmun ah DC&MA Secretary hovin Boundary Study Team hi a tir ta a ni.

LADC leh CADC Ramri a hmuna enfiahtute hian  Parva -I, II, III leh IV a Village Council leh Tlawmngaipawl, Young Chakma Association, Young Lai Association leh Young Mizo  Association hruaitute bak ah, khawtlanga mibik leh ramri chungchanga biak awm deuhte an kawm a, an zirchianna report chu thuneitu sangah an la thlen ang.

Boundary Study Team Chairman Pu Lalhmunsanga Hnamte, Secretary DC&MA hi Lawngtlai Bawrhsap Pu Donny Lalruatsanga,   Pu Joseph Lalrinawma, Addl. Secretary, DC&MA, Pu V. Zaithanmawia, Jt Secretary, DC&MA te bakah Executive Secretary LADC leh  CADC bakah Official pawimawh dangten an tawiawm.