Lai Autonomous District Council, United Democratic Alliance Sorkar a Chief Executive Member Pu N.Zangura'n Executive Member atan a rawt, mi pakua, Governor in Executive Member atan a ruatte chu vawiin khan Additional DC, Lawngtlai Pu David Lalrinawma'n, LADC Hall, Lawngtlai ah rinawmna a tiamtir.
Executive Member pakua te chu Pu.Sanghuliana Mualchin, Pu C. Rongura, Pu C. Lalsawmzuala, Pu Andrew Laltlanzara, Pu Lalropuia Chinzah , Pu .L. Daniala, Pu C. Hrangthianga, Pu .HC Lalthawmliana leh Pu .H. Lalmuansanga te niin, CEM Pu N.Zangura chuan vawiin a Executive lakluhna ah hian amah CEM leh Executive Member te hna chanpual tur a puang nghal a, Executive Member te hian an room an luah nghal.
Executive Member lakluhna ah hian CEM Pu N.Zangura chuan, 11th LADC Term ah Sorkar kal mumallo a nasat vangin mipui leh hnathawktute pawn an tuar nasa tih sawiin, mirinawmte, thlemna hrang hrang hnawl ngamte vangin Sorkar thar a piangta chu thil lawmawm tak a ni a ti a, UDA Sorkar chuan thuneihna leh rorelna khairual kalpui a tum tih sawiin, mimal ngaihdan leh duhdan in hmun a chan a rem dawnlo a ti a, Executive Member tharte pawh mahni thawhpuite zai ngaithiam turin a chah.
CEM chuan Governor in Pu C.Lalmuanthanga chu Vice Chairman, Planning and Development Committee atan a ruat thu leh Pu BN Thangpuia chu Adviser to CEM atan a ruat bakah Pu Tuturu Singh chu Deputy Chief Whip atan a ruat thu a sawi a, Pu Lalthanmawia Cloney chu Chairman Town Committee atan ruat a ni bawk
Tags
News