Lai Autonomous District Council chungchang, High Court in vawiina a ngaihtuah chhunzawmah thutawp siam a la la nilova, Gauhati High Court, Aizawl Bench chuan LADC chungchang hi karleh Nilaini July 23, 2025 ah ngaihtuah leh turin a dah.
LADC a Chief Executive Mermber lo ni tawh, tuna ZPM, MDC nilai Pu V.Zirsanga chu kumin February 27 khan CEM atan lakluh niin, a kaihhruai LADC a ZPM Sorkar chuan Budget Session pawh kumin April 17 atanga 22 chhung khan neiin, Budget pawh passed a ni a, Budget erawh dan kalh a passed ni a sawiin Governor in a pawmlo.
Hemi hnu hian BJP leh MNF ten an din United Democratic Alliance chuan LADC ah Sorkarna an siamthei tih Governor hnena an thlen hnu ah an hruaitu M.Kawnpui bialtu MDC, BJP hruaitu Pu N.Zangura chu kumin May 8 khan CEM atan lakluh a ni.
ZPM Sorkar a CEM Pu V.Zirsanga chuan CEM atanga paih a nihdan ah dan palzutna a awm ni a hriain, dikna humhim a nihtheih nan hma la turin High Court ah a thlen a,
Gauhati High Court, Aizawl Bench chuan he thu hi kumin May 15, June 10 leh vawiin July 16 khan a ngaihtuah a, karleh Nilaini July 23 a ngaihtuah leh turin a dah.
High Court thukallai a awm vangin LADC ah hian Sorkar mumal a kalthei lova, tuna CEM nilai Pu N.Zangura pawh hna thawk theilovin dah mek a ni.
Dan pangngai ang chuan LADC ah hian kumin kumtawp khian Inthlanpui neih a ni ang.
Tags
News