Lai Autonomous District Council a Environment, Forest & Climate Change Department enkawltu Executive Member Pu HC Lalengkima chuan LADC Sorkarin theihtawp a chhuah vangin kawngkama thingphunte chu a nungthain, uar zawkin beihpui thlak zel tum a ni a ti.
Pu HC Lalengkima hian vawiin khan Lawngtlaia thuthar thehdarhtute lengah sawmin, LADC huamchhunga kawngpui kamte chu a theihna lai apiangah Thing phun khah vek tuma hmalak a ni tih sawiin, tuna phun nunsa pawh hmuha nuamin zinmite tan pawn a hahdam thlak viau tawh a ti a, kum 2015 atanga kumtina Thingphun beihpui thlakna Green LADC Day chu tunkar Zirtawpni ah hman tum niin, Lawngtlai leh Kawlchaw inkar National Highway kamah Thingtiak 420 phun tum a ni a ti a, Kawngpui kama Thingphun enkawlzuina ah mitinin an mawhphurhnaa an ngaih a pawimawh hle a ni a ti.
Executive Member tawiawmtu DCCF, Pu K.Lalromawia chuan Thingtiak 3376 phun a ni tawh tih sawiin, Forest Department ten an enkawlzui reng vangin zaa 90 chuang a nungtha a ti a, Green LADC Day ah Forest Range paruk leh Beat Post ah te pawh Thing tiak an phun vek dawn niin a sawi.
Chanchinbumite chuan Thingphuntu Department ten a enkawlzuina ah tanla deuh se an duh thu te, Thei lam chi phun uar deuh deuh nise an duh thu te an sawi leh, Roadside Plantation thatak a awmtheih nana rawtna an neihte chu Executive Member Pu HC Lalengkima chuan a theih anga an lo bawhzui tur thu a sawi.