Dr.Lorrain Lalpekliana Chinzah chuan Ngengpuilui Lei vawiin khan a hawng.

Sorkar thuchhuaha tarlan a nihdanin, vawiin khan Dr. Lorrain Lalpekliana Chinzah, Adviser to Chief minister, Lawngtlai East bialtu MLA  chuan Lawngtlai-Diltlang-Parva kawnga Ngengpuilui Lei dawh a hawng. He Lei hi Ngengpuikai Lawngtlai District leh Khawmawi Lunglei District inkara Ngengpuilui ah dawh a ni.

Dr. Lorrain Lalpekliana  Chinzah chuan India khua leh tui, Mizoram leh a bik takin Lawngtlai mipuite leh a mamawhtu zawng zawngten tha leh tangkai taka hmang tura  lawm taka  Ngengpuilui Lei dawh a hawng thu a sawi a.  He Lei dawh a nih theih chhan ber sawrkarlaipuia Ministry of Defence leh   Pu Rajnath Singh, Defence Minister, hmalakna fakawm a tih thu a sawi.  He Lei dawh hna  thawktu 71 RCC Border Roads Organisationv(BRO) Lawngtlai,  hnathawh fakawm a tih thu sawiin MLA chuan Lawngtlai mipuite tana an hnathawh zawng zawngah  lawmthu hrilhin, an hnathawh leh inpekna chu  Lawngtlai mipuiten an theihnghilh ngai dawn lo a ni, a ti.

Adviser to Chief Minister chuan vawiina hawn tak Lei dawh hian Ngengpui khua leh Khawmawi tan inkal pawhna awlsam zawk a siam mai a ni lo a, sawrkarlaipuiin a ngaih pawihmawh em em 'Act East Policy'  atak a tihhlawhtlinna kawngah awmzia neiin, a tangkai dawn hle a ti . Mizoram sawrkarin 'Chamdur Project'  a ngaipawimawh hle tih tarlangin MLA chuan  he project hlawhlinna turin inkalpawhna tha tak a ngai a, vawiina leidawh tha tak avang hian  Chamdur Project pawh chak zawka kalpui thuai a ni ang a,  Lawngtlai West bial chu Mizoram ei leh bar a chawmtu ber (Rice bowl of Mizoram)  a ni thei thuai dawn tih  a tarlang.

Dr. Lorrain Lalpekliana Chinzah chuan fur ruahrui tlak nasat avangin kawngpuiin nasa takin a tuar a, hmun hrang  hrangah  leimin pawh a nasa hle a ti a.  A bik takin buhfai phur motor lian ten Bungtlang South chauh an thleng thei tih sawiin, hei hian buhfai chungchangah harsatna lianzawk a thlen a hlauhawm hle a ti a. FCI godown  - ah  monsoon stock, buhfai a tlem tawh hle tih tarlangin,  Bungtlang South piah khua  hrang hrangten harsatna an tawh lohna turin 71 RCC Border Roads Organization - te chu tun thla chhung ngeia buhfai phur motor lian kal theih tura kawngpui siam tha turin a ngen a. 71 RCC BRO - ten an enkawl mek Lawnglai to Parva kawng (Km-160) a thui pawh a hma thei ang bera cheihnawm leh siam  tha turin a ngen nghal bawk.

Vawiina hawn tak Ngengpuilui Bridge  hi metre -125 a sei  niin, sawrkarlaipuia Ministry of Defence kaltlanga dawh a ni a, 71 RCC Border Roads Organization (BRO) ten Lei dawh hna hi an thawk a ni.