LADC Sorkar thuchhuahin a tarlan danin, vawiin khan District Institute of Education and Training (DIET), Lawngtlai chuan an Multipurpose Hall-ah Graduation Day inkhawm an hmang a, Lai Autonomous District Council-a Chief Executive Member, Pu C. Lalmuanthanga, chu khuallian atan hman a ni.
Thuchah a sawinaah Pu C. Lalmuanthanga chuan, Lawngtlai District hi ziak leh chhiar thiamna lama hniam ber kan ni a, harsatna tam tak a awm chung pawh a, DIET Lawngtlaia zirtirtu leh zirlaite thawhrimna chu lawmawm a tih thu leh result tha tak an nei thin chu lawmawm a tih thu a sawi a. In thawhrimna avangin nasa takin hma kan sawn phah a ni a ti a. Zirna pawimawhna sawiin, zirna lama harsatna paltlang tur chuan technology lama hmasawn a tulzia a sawi uar hle.
Zirtirtu hna zahawmzia sawi bawkin Khuallian chuan zirna lama inpekna leh thiamna pawimawhzia a sawi a. Sorkar-in thiamna nei mi a ngaipawimawh a, mithiam leh tling ngei (merit) zirtirtu atan lak anih tur thu a sawi bawk.
He inkhawm ah hian DIET Principal Pi Ngunhmingliani Chinzah chuan thusawina a nei bawk a, Catholic Church, Lawngtlai Rector & Principal Rev. Father Nelson Joseph chuan hunserh a hmang. ANM Principal Pi F. Lalnunsiami bakah Pu Elvis Lalthangzuala, MJA Lawngtlai President leh Thingkah Middle School leh Primary School Headmaster-te pawh an tel.