Lawngtlai a Intensified IEC Campaign - India Fight Against HIV/AIDS & STI kal zelah tukin zing dar 9:30 khan Depuy Commissioner Office kawtzawl atanga Areopagy, Bazar, Lawngtlai inkarah kawngzawh (Rally) neih a ni a. Pu Cheemala Siva Gopal Reddy, District bawrhsap leh Chairman, Lawngtlai District AIDS Prevention Control Committee (DAPCC) nibawk chuan 'Rally' hi a vailiam.
Pu Cheemala Siva Gopal Reddy, chuan zirlai naupang leh zirtirtu kalkhawmte hnenah lawmthu sawiin, HIV/AIDS leh Sexualy Transmitted Infections (STI) tirem tura tan lak a ngaihzia hriaa hun chep tak kara thahnem tak an kalkhawm thei chu fakawm a tih thu a sawi. India ram mai ni lo, khawvel pum huap pawha natna hlauhawm leh tihbaiawm tak HIV/AIDS leh STI laka filhlim turin mitin an pawimawhin mawhphurhna sang tak an nei a ni, a ti a. A bik takin Zirlaite chu mipat hmeichhiatna leh ruihhlo laka filhim a tul hle tiin, nupui pasal neih hmaa 'sex' hmang lo turin a chah a. Mizoram chu HIV/AIDS vei tamna anih mek avangin he natna hluar zel tur ven leh do kawngah tumah inthlahdah theih a ni lo tih sawiin, zirlaite chu intiamkamna nei tur leh hmalam huna a taka nunpui turin a sawm.
Pu Cheemala Siva Gopal Reddy chuan School hrang hrang atanga zirlai lo kal ten 'Banner' leh 'Placard' hmanga thuziak tha tak tak an siam chu fakawm a tih thu sawiin, an thuziak ang ang a tak a nunpui tur leh midangte hnena zirtirna pechhawngtu ni theuh turin a chah.
Dr. David Zothansanga, Sr. Chief Medical Officer leh Member Secretary, District AIDS Prevention Control Committee (DAPCC) nibawk chuan Areopagy ah hian thuchah a sawi a. Vanduai vanga kai palh awm thin mahse, HIV/ AIDS kaina tam ber chu mipat hmeichhiatna hmang fimkhur loh vang leh syringe - thianghllim lo in hmantawm vang a nih thu a tarlang a. Ram leh hnam anga ding chhuak tur leh hmalam hun eng tak nei turin tuna zirlaite an pawimawh hle tih sawiin Dr. David Zothansanga chuan HIV/AIDS leh STI kaitheihna hrang hrang laka fimkhur tur leh a darh zel tur do na kawnga theihtawp chuah turin kalkhawmte a fuih a. Lawngtlai khawpui atanga HIV/AIDS leh STI- te umbo a nih theihna tura thawhpuiah Lawngtlai mipuite a sawm nghal a ni.
'Intensified IEC Campaign' hi India rama HIV/ AIDS Programme khaikhawmtu National AIDS Control Organization (NACO), Ministry of Health & Family Welfare, Government of India, in India rama State tina district leh thingtlang kilkhawr zawng zawnga mipui nawlpui hnena HIV/AIDS leh STI chungchang inzirtirna beihpui a thlakna a ni a. He Campaign - hi thla hnih chhung awh tura duan niin, Rally chauh ni lo in, Quiz Competition, Debate leh inelna dang hmangin Zirlaiten hun an hmang thin dawn a ni.
Tags
News