Rajya Sabha MP, Pu K.Vena'n KMMTTP kawngpui, Myanmar ramchhung thlengin a tlawh.

Rajya Sabha MP Pu K.Vanlalvena chuan Mizoram chhim tawp leh Bay of Bengal inkal pawhna tur Kaladan Multi Modal Transit Transport Project (KMMTTP) kawng siam mek a tlawh.

Pu K. Vanlalvena leh amah tawiawmtute hian tunkar khan Myanmar ram chhunga Arakan Army hel pawl Camp a hun an hman hnuah KMMTTP kawngpui chu Contractor te nen an enho bawk. 

Lawngtlai District, Zorinpui atanga Paletwa inkar kawngpui sial mek chu ramri atanga  Myanmar ram chhung Km 8 a thui thleng Pu K. Vanlalvena te hian an tlawh a.  He kawng laih mek hna thawktu IRCON Company Deputy Manager leh an hnuaia hna thawk tu Myanmar sub-contractor te nen  inkawmin kawng laih hna hi beisei aia a muan thu leh chak thei ang bera thawh a tul thu Pu K. Vanlalvena hian a sawi bakah Arakan Army hotute hnenah pawh he kawng laih mek hi zawh a nih hunah chuan a tawn tawna chengte chhawr tangkai tur a nih avangin hnathawktute lo tawiawm turin a ngen.

 Contractor-te chuan tun atang chuan chak taka hna thawh a nih tawh tur thu Rajya Sabha MP hnenah hian an lo thlen a. Arakan Army hotute pawhin kawng siam tute tana harsatna an siam dawn loh bakah a tul dan a zir zelin venhimna an pek zawk tur thu MP hi an hrilh bawk a ni.