Kawngchhia vangin Chawngte ah kawngzawh huaihawt ani.

Chawngte a Mizo leh Chakma tlawmngai pawl hrang hrang intelkhawm chuan Chawngte khawchhung kawngpui chhiat vanga lungawi lohna lantir nan vawiin khan mi 500 chuangin  kawng an zawh.

Chawngte football ground atangin SDO (Civil) office thleng kawngzawhnaah hian pawl hrang hrang aiawh ten thu ansawi a, Chawngte hi kawng hrang hrangah ngaithah kan ni a, kawng chungchangah kan chan tur leh a nih dan tur ang kan ni phalo fo thin a ni, Mizoram sorkar hian kan dinhmun harsat zia hi hria se, min ngaihsak ve se kan duh   an ti,   kan khawtlang thatna tura hmalak hi NGO te chauh hi a mawhphurtu kan nilova, CADC sorkar pawh hian theih tawp chhuah ve rawh se, kawng siam tha tur hian CADC hian hma anla tawk lo em ni tih hi kan zawhna a ni an ti.

Vawiin kawngzawhah hian, Chawngte khaw chhung kawng chhe lutuk hi Mizoram sorkar hian siam tha vat rawhse, tih te, Chawngte kawng siamtha tur hian Mizoram leh CADC Sorkar in hma laturin an phut thu te, ngaihthah bik nihna an duh loh thute an auchhuah pui a, ‘No road, No vote, No election’ tih thuziak te an keng tel bawk.  

All NGO kal khawm chuan Mizoram sorkarah Chawngte SDO (C) kaltlangin   memorandum an thehlut nghal a, Chawngte Civil SDO, Pu Lalneihthanga Colney chu Election thila training a neih lai a nih avangin SDO charge latu, Pu Samar Bijoy Chakma chuan Civil SDO aiawhin memorandum hi a dawng a, Pu Samar-a hian tlawmngaipawl hruaitute hnenah  memorandum chu Lawngtlai DC office ah thawn nghal a nihtur thu a hrilh.

Vawiina All NGO ten Memorandum an theh luhah, kawngpui chhiat avanga Chawngte mipui harsatna tawh mek tarlangin, School leh College Zirlai ten nitin zirna in an panna ah  harsatna an tawk reng a, chhungkaw hrang hrang eizawnna leh lirthei hmanga eizawng te pawhin harsatna an tawk reng bawk a, chuvangin Mizoram sorkar leh CADC sorkar in kawngpui   siam that a nih theih nan chak taka hma la tura an duh thu an tarlang a, All NGO hruaitu te chuan Sorkara an thu thlen hi September 9, 2023 (Zirtawpni) thleng pawha hmalakna an hmulo a nih chuan a tawp thlengin hma lakzuizel an tum thu an sawi.