Lai Autonomous District
Hqrs : Lawngtlai
PRESS RELEASE
No. 20 of 2023
Dated Lawngtlai, the 5th September, 2023
ENG VANGIN NGE BJP AH KAN AWM?
"I nunna turin tlanchhuak rawh" (Genesis 19:17)
Mizoram a Autonomous District Council (ADC) te hi kum 1972 ah lo piangin, kum 50 lai kan lo ni ve ta a, nikum 2022 ah Golden Jubilee kan lawm nghe nghe a nih kha! Kum 50 zet kan kal tawhnaah tunlai khawvel hmasawnna te ûm pha ve turin thanlenna nei thei lovin kan awm mek a ni.
Vawiinni a kan Council inenkawl mêknaah hi chuan, kan leng thlawt tawh lova. Bâwm tawt taka khung khawm ang mai kan ni. State Sorkar in department min pek chhun te pawh hi tha taka function turin sum pek tel kan ni bawk si lova, sa tahchhuak pek ang chauh a ni. Heng te hi avang hian, kan thanlenna tur kawng dapin kan hruaitu hmasate pawh khan, theihtawp an lo chhuah tawh thin a, Central a Congress Sorkar lai khan Direct Finance te pawh vawi duai lo an lo dil tawh thin a ni. Pi Sonia Gandhi pawh khan ziak meuhin Direct Funding hi a lo tiam a, Mizoram a Congress Ministry pawh khan heihi Central-ah recommend angin an insawi a, kan lawm hle nghe nghe a nih kha!
Mahse, khatih hun Congress Sorkar laia Cabinet Minister Pu R. Lalzirliana chuan, kha tianga recommend anga an insawi kha, "Lem ang derna (bumna) mai mai" a nih thu a sawi a. "An ni lahin an lo awih ve êm êm a" tiin deuhsawh takin a sawi a nih kha. Mak deuh mai chu, Pu Zira thu sawi hi vawiin thlengin Congress Party hian an la react miah lo! Hei hian a lantir chu Minister Pu R. Lalzirliana thu sawihi thu dik ngei a ni a, Congress Party khan minlo bum kual mai mai tihna a ni. A inhmuhsit thlakin, a rilrunatthlak hle mai! Tin, Delhi lamah pawh Congress hian min tiam angin, engmah hmalakna a awmlo bawk. Chuvangin, keini Lai leh Mara hnam tan chuan bum hmang Congress Party hi belh leh tlak a ni lo a, kan ramah a chi chhuah tur pawh awm tawhlo hial tura siam a tul hle a ni.
Tunah ram leh hnam hmangaihtu ten, kan ram leh hnam din chhuah ve nan leh nakin zela thangtharte hmakhua thlirin, Central Sorkar hnenah Sixth Schedule a provision tha tak tak dahturin, mahni sum sengin Delhi tlangah nasa takin an nawr a, Central Sorkar pawh a inhawng viau a ni. He thil hi keini chauh ni lovin, North East a District Council dangte pawhin an dilin an nawr ve theuh bawk. He mi chungchangah hian Union Home Ministry chuan a thu phungin State Sorkar hnenah, kan thil dil point te tarlangin, comment pe turin an rawn ti a. ADC awmna state dang chuan, tha takin recommend an pek laiin, vanduaithlak takin keini Mizoram State a MNF Sorkar chuan, a chhe thei ang berin comment min pek sak thung a ni.
MNF Party hian tun chauh hi ni lovin, tunhma Peace Accord an sign dawn pawh khan ADC te hi "Rem Ar" ah minlo talh tep tawh a, Central Sorkar in an remtih loh avangin an hlawhtling ta lo a ni. Tin, MNF President Pu Zoramthanga khan CM a nih huna a hna hmasa turah Chakma ADC thiah a tum thu a lo sawitawh bawk. Mahse, ADC te hi India danpui Sixth Schedule hnuaia chuang kan ni a, an duh hun huna thiah mai mai theih kan lo ni si lova, a hlawhchham leh ta a ni. Tichuan, a vawi thumna atan Sixth Schedule Amendment chungchangah, kan din khaw chhuah ve na tur chu phal lovin, min hnawl saka, a chhe thei ang berin min comment sak leh ta a ni. A nihna takah chuan, Lai leh Mara hnam tan chuan MNF Party hi hmelma lian ber anni a, han belh ngam rual anni lo. Heti chung hian Lai leh Mara hruaitute zinga MNF la bel tlat an awm hi, thil zahthlak tawp khawk a ni.
Chutiang bawkin ZPM party te pawh hi lo Sorkar pawh ni sela, kan beisei thuneihna lian min pe theitu anni chuang lo. Chuvangin, keini Lai leh Mara hnam te hi hnam dinchhuahna lam thlir chuan, belh tur leh innghahna reng reng kan neilo a, Riakmaw Sirva iangin kaina rûn kan vai a ni. Hetih lai hian ADC Area a BJP Co-ordination Committee chuan, kan thil beisei mek chu beidawng lovin an bawhzui zel a. Central BJP Sorkar pawh a inhawng zauin, "kan tihsak ang che u" anti a ni.
Awle, BJP chauh hi tunah chuan kan thil duh min tihsak theitu chu anni a, innghah ngamna kan neih awm chhun party anni ta a ni. Chuvangin, kan hnam din khaw chhuahna turin BJP ah hian kan awm ta a, chu chu BJP kan belh tlat chhan dik tak chu a ni. He thil hi Party mal thiltih satliah a ni lova, hnam issue a ni a, politics dik tak chu a ni tih hi mipuite hian i hre thar leh ang u. Kan hnam dinchhuahna tur hian hmalam pan zel ila, kan tan kawl a eng dawn ta e.
Manipur a chi leh chi in kara buaina, mahni ram/state chhung buaina ang mai a kan buaipui hi a awm viau e. Inremna tha tak an neih theihna turin tihsak theih erawh kan nei tamlo viau mai! An tuarna hi erawh kan tuarpui takzet a, theihtawpa Tawngtaipui hi kan tihtur pawimawh tak a ni. An buaina bul tan erawh han ngaihtuah chuan, an hnam tana tha tur an ngaihtuahnaa an beihna rahchhuah ani kan tithei ang. Meitei hovin Schedule Tribe nih ve an duh a, Manipur High Court in Schedule Tribe a dahturin order a tichhuak a. Chu chu Tlangmi ten hriain, Schedule Tribe an nih avanga hamthatna hrang hrang an dawn te, Meitei mi tam zawk ten an neih ve chuan, an tan tha dawna an hriatloh avangin, Zirlai ten kawng an zawh a, chu chu Meitei hote nen in tibuaiin, buaina intanna a lo nita a ni. Tunah Tlangmite chuan Seperate Administration an demand a, kan sorkar hotute pawhin Mizo hnahthlak anni e tiin an support a. Chutihlaiin, an ram chhung (an state chhung) ngei a Lai leh Mara hnam te thil demand erawh an hnawl leh si. Kuki unaute angin, keini Lai leh Mara te hi Zohnahthlakah min ngai ve ta lo em ni? tih hi kan zawhna a ni e.
Pathianin kan ram leh hnam te min hruaizel rawhse
Issued by Bharatiya Janata Party Lai Autonomous District Hqrs : Lawngtlai