Lawngtlai DC Pu H.Lalhmingthanga chuan July 18, 2023 ah District Jail Lawngtlai ah mahni intihlum a awm a, August 17, 2023 ah District Jail, Lawngtlai atangin Jail tang pakhat a tlanchhuak a, hetianga thil duhawmloh tak District Jail a a thleng hi District Administration chuan pawi a tiin, District Jail Lawngtlai dinhmun thlirchian atul vanga Meeting koh a nih thu a sawi a.
Jail Superintendent Pu HC Hratliana chuan August 17, 2023 zing dar 6 atanga dar 7 inkar ah Joseph Zomuanpuia (21) S/o B.Lalawmpuia, Khawmawi, Lunglei District chu Jail atangin a tlanchhuak tih sawiin, nguntakin zawnmek a nih thu a sawi a, man a nihtheih nan hmalakdantur leh tulpawimawh dang te sawizui a ni.
Vawiin Meeting ah hian Pu T.Ramzauva AIG Prison leh Pu HC Hratliana Superintendent District Jail, Lawngtlai ten Jail tihchangtlun nan a tulpawimawhte report an pe a, District Jail, Lawngtlai a thawktu indaihloh chungchangte, Security Duty kalpui dante, Jail chhung tihchangtlunnan a ruahmanna te, Jail tang ten kut themthiamthiamna lam an zirtheih dantur te, taksa leh rilru hrisel an neitheih nan a hmalak a tul thute sawilan niin, District Jail thuneituten thuneitusang a thlentur pawimawhte lo ruahmanse, District Administration lamin bawhzui theih ang angte lo bawhzui se an ti.
Lawngtlai DC Pu H.Lalhmingthanga chuan District Jail, Lawngtlai chu tuna a nihdan ang atang pawn inrelbawlna leh enkawlna thazawk a awmtheih nan thawktute tanla sauh sauhturin a chah a, District Administration atanga District Jail hmasawnna atana bawhzui ngai awmte chu an lo bawhzui tur thu Meeting ah hian a sawi.
Vawiin Meeting Pu H.Lalhmingthanga, Lawngtlai DC kaihhruaiah hian Lawngtlai SP, Pu Lokeshwaran, Additional DC Pu Abraham Beirazi Khithie, Pi Margaret J Vanlalremmawii SDO(S), Dr.Doris Lalrinawmi SDC, Pu T.Lalramzauva AIG Prison leh District Jail thuneitute leh venhimnalam a mawhphurtute an tel.