Tho Law Dir Tuah hnuaiah hian Lawngtlai khawpuiin Faina, Thianghlimna, Mawina leh inrelbawlna felfai zawk a neihtheih nan kawng hrang hrangin hmalakna kalpui mek a ni a, CEM chuan District Administration leh LADC Sorkar in tanhona thatak an nei chuan hmalakna a tiawlsamin, mipuiin rinna tak tak an chungah an nghat tih sawiin, reilote chhungah ringawt pawh Lawngtlai khawpuiin hmelthar a hmu chho tan chu a phurawm hle a ni a ti.
Stand up Lawngtlai hnuaiah hian khawpui cheimawi hna veng hrang hrangah thawh mek niin, zanlama hnawksak taka kawngkama lirthei dahte pawh mumal zawkin Veng tina mawhphurtute enkawlna hnuaiah kalpui mek niin, hmun remchang laiah Thut chawlhna te siam niin, khawpui chhung kawngpui chei hna thawh chhoh mek a nih bakah hmun pawimawh laiahte CCTV dah turin ruahman a ni a, mumal zawka bawlhhlawh paih leh sawngbawlte, mipui nawlpuiin khawpui tan tha an thawh theih dan turte ruahman a ni bawk.