District Election Officer, Pu H.Lalhmingthanga chuan August 29-31, 2023 hian Election Commission of India hotuten Aizawl an rawn tlawh dawn a,Lawngtlai District a hmalakna te chipchiar taka thlen a ngaih thu a sawi a, Election chu District Election Office a mite tan chauh buaipui theih a nilo tih sawiin, Inthlanna dik, felfai leh rintlak neiturin mawhphurna neiten thataka an hlenchhuah a ngai a, Sorkar, Political Party, Tlawmngaipawl leh Mipui tanhona thatak a pawimawh tih sawiin chutiang thawhhona neitur chuan a sawm.
Vawiin a Lawngtlaia Election Meeting neih ah hian Polling Booth thuamthat dan turte, venhimna lam te, Inkalpawhna kawng leh mipuiten thataka vote an thlak theih nan a tihtur pawimawh hrang hrang te an sawiho.
Lawngtlai District a Assembly Constituency pathum, Tuichawng, Lawngtlai West leh Lawngtlai East ah Polling Station 181 awmin, Sector 26 ah thenin, Sector tin viltur Sector Officer ruatfel an ni tawh a, Sector Officer te hian an huamchhunga tihtur pawimawhte an thawk tan chho mek tih Meeting ah hian sawilan a ni.
Vawiin Meeting ah hian a bikin Tuichawng leh Lawngtlai West a inkalpawhna harsat zualna laite siamthat a nihtheih nan hmalakna tur hrang hrang duan a ni a, Inthlanna tluang taka neih a nihtheih nan buaipui hmasak ngaite mawhphurtu Department hrang hrang ten an bawhzuitur ruahman a ni bawk.
Meeting ah hian Lawngtlai SP Pu Lokeshwaran bakah Nodal Officer leh Sector Officer te, thungaihtuah kaihhnawih a mawhphurtu LADC leh State Sorkar Department hotute an tel.