CEM chuan LADC chuan hmasawnna kawng a zawh chhozel tih sawiin, LADC in chhiah a lakkhawm pawh tangkai takin hman a ni tih sawiin, tuna Finance & Accounts Department Building thar hawn tak chu chhiahtling khawm hmanga sak niin, chhiah hi tangkaitaka hman a ni ti a lanfiahtir a ni a ti.
Pu V.Zirsanga chuan LADC a thawktuten thahnemngai taka an thawhrah chu mipuiin an chhawr thin tih sawiin, Politician te chuan lanhun leh bikbo hun an neia, LADC hnuaia thawkte chu ram innghahna tak tak zawk an ni a ti a, Sorkar kum kalmekah chhiah tlingkhawn atanga hmuh beisei zat cheng Nuai 300 chu khum theih ngei beisei a ni a ti a, Environment, Forest & Climate Change Deptt. chuan chhiah an hmuhtura beisei an hmuchhuak der tawh a ni a ti.
H hun ah hian LADC a Chairman Pu V.L.Hmuaka pawhin thusawiin, ram siama, ram hausakna haichhuaka intodelh tura tanlak deuh deuh a tul thu a sawi.
Technical Report a tarlan a nihdanin Finance & Accounts Building thar hawn tak hi Floor li niin, Kum 2018 a saktan niin, Electric Wiring tellovin cheng Nuai 167.44 senral a ni a, Square feet 9067 a zau a ni.