10th CADC-a CEM pathumna atan Pu Durjya Dhan Chakma lak luh a ni

 

Nimnin April 6, 2021 khan 10th Chakma Autonomous District Council (CADC)-a Chief Executive Member (CEM) atan Pu Durjya Dhan Chakma chu CADC Rest House Complex, Kamalanagar-ah Lawngtlai District Additional Deputy Commissioner Pi Marylin Rualzakhumthangi chuan rinawmna thu tiamtirin, a la lut.

10th Chakma Autonomous District Council CEM atana lak luh thar Pu Durjya Dhan Chakma hi April 2018-a CADC inthlanah khan Mizo National Front (MNF) ticket-in 5-Kamalanagar North bial atanga thlan tlin a ni a. March ni 29, 2021-a CEM atanga bang ta Pu Rasik Mohan Chakma thlak turin Governor chuan CEM thar atan a ruat a, heti hian 10th CADC-a CEM pathumna a ni ta a ni.

CADC ah hian March 27 khan BJP member paruk te chu bangin MNF an zawm Tundinhmun ah  CADC-ah hian MDC seat 20 awm ah MNF-in Member 18 neiin, BJP-in Member pahnih an nei.

CEM atana lak thar Pu Durjya Dhan Chakma chuan, langtlang sorkar kan din dawn a. Hnathawktute pawhin rinawm takin hna kan thawk tur a ni ang. Kan khawtlangin hma a sawm theihna turin theihtawp chhuah a tum a, chu hmasawnna kawng a hna kan thawhna ah chuan NGO emaw Political party ang pawhin thurawn tha tak tak kan dawngsawng thei reng a, chutiang tur chuan thawhhona tha i nei ang u, tiin a sawm bawk 

CADC CEM atana lak luh thar Pu Durjya Dhan Chakma hian a thawhpui tur Executive Member atan mi pali - Pu Hiranand Tongchangya, Pu Bhuban Kumar Chakma, Pu Uday Tongchangya leh Pu Sanjiv Chakma te chu lak luh an nih tur thu a puang nghal a. A vaiin Executive Member hi pasarih (7) an awm dawn a ni.