Lai Autonomous District Budget Session neihzawh tak ah House Leader, CEM, Pu Manghmunga chinzah in, Mizo kan ni a, amaherawhchu Lusei kan nilova, Lai kan ni tih a sawi chungchang ah, CEM hian Press Statement siamin thupha a chawi.
Nimin khan Lawngtlai Press Club ah LADC a MNF Legislature Party te chuan Chanchinbumite kawmin, Executive Member, Parliamentary Affairs changtu leh MNF Legislature Party a Deputy Leader Pu T.Lalengmuana chuan, CEM chu a hriselna a thatloh vanga Press Conference a a kaltheihloh thu sawiin, CEM thupha chawina, ama hming ziakhnan ngei chu a chhiar chhuak a, CEM Press Statement a a landanin, Budget Session neihzawh tak ah Mizo kan ni a, amaherawhchu Lusei kan nilova, Lai kan ni, a tih chuan Lairam mipui leh NGO thenkhatte rilru a tina chu pawi a tih thu sawiin, thinlung taka thupha a chawi thu a tarlang.
A thusawi vanga Lairam mipuite rilru ah ram leh hnam tana thahnemngaihna a langchhuak chu lawmawm a tih thuCEM chuan tarlangin, mahni hmazawn theuh ah ram leh hnam tan theihtawp chhuah turin mitin te a sawm.
MNF Legislature Party Secretary Pu K.Hre-Kung chuan MNF legislature Party chuan House Leader thusawi chungchanga rilru na leh damlo zawng zawngte hnen ah ngaihdam an dil tih a sawi.
Chanchinbumite zawhna chhangin Adviser to CEM, Pu H.Lalmuansanga chuan, House a CEM thusawi chu nawtreh turin CEM chuan LADC Chairman hnen ah dilna ziakin a thlen tawh a ni a ti.
Press Conference ah hian Pu K.Hre Kung, Pu T.Lalengmuana, Pu VL Hmuaka, Pu CL Lianzuala, Pu Sanghuliana MUalchin, Pu H.Lalmuansanga bak ah MNF Dist Hqrs Treasurer Pu Lalzahawma Chinzah bak ah MNF Party hruaitu thernkhat te an tel.