Nimin chhun a Lawngtlai District chhung, T.Dumzau khua a chenna In 28 kan vangin, vawiin khan chhawmdawl hna thawh tan nghal a ni.
Lawngtlai West bialtu MLA Pu C.Ngunlianchunga chuan kangtuarte mamawh hmasa tur buhfai leh chawhmeh leh thildang thahnem tak kengin vawiin khan T.Dumzau a thleng a, tanpuina hmasa hi khawtlang hruaitute hnen ah a hlan.
Lai Autonomous District Council a Executive Member DM&R enkawltu Pu C.Rongura chuan vawiin khan T.Dumzau a Chenna In kang chhungkua 28 hnen ah tanpuina Rs.10,000/- theuh a hlan a, LADC a CEM Pu Manghmunga Chinzah chuan kang tuarte a tawrhpui thu leh In leh lo dinna turin Council Sorkar chuan theihtawp a chhuahtur thu a lo sawi tawh bawk.
Central Young Lai Association hruaitute pawh vawiin khan T.Dumzau ah hian kalin Rs 55.000 bak ah Buhfai mutbu leh thawmhnaw te an hlan a, Branch YLA engemawzat chuan T.Dumzau a kangtuarte tanpuina leh chhawmdawl nan mutbu, buhfai leh chawhmeh lam chi bak ah pawisa fai engemawzat vawiin khan an hlan bawk.
Assam Rifle lam chuan kang tuarte buaizual chhung, ni hnih khat chhung chu an eitur an siamsak dawn a, T.Dumzau khua hi In 70 vel niin, chenna In 28 kang te hi, In kang velo ah a theih ang angin chhungkhat laina hnai leh thenawm khawveng te belin an khawsa a, kang tuarte chenna In tur sak hna hi naktuk atangin thawh tan tumin khawtlang hruaitute chuan ruahmanna an siam. Vawiin tlai dar 4:30 thleng khan tanpuina pawisa lutzat hi cheng Nuai 3, sing 9 sang 9 zanga sawmnga a tling tawh.
Tags
News