Vawiin chhun khan Lawngtlai District chhimthlang lam a awm, T.Dumzau khua-ah kangmei chhuakin, hriattheih chin ah chenna In 27 a kang.
He chanchin buatsaihlai hian kangmei chhuah chhan hi hriatchian nilomahse, thudawna thenkhat chuan, lohal atanga mei siper vanga kangmei hi chhuak niin an sawi.
Kangmei chhuak vang hian thi leh hliam an awm hriat a nilova, bungrua thahnem tak erawh a kangral.
Lawngtlai DC Dr.Andrew H.Vanlaldika chuan kangmei tuarte chhawmdawlna hmasa atan Rs.10,000/- a pechhuak nghal a, Bungtlang South BDO Office atangin kangmei chhuahna hmun ah hian thilawmdan enpuiturin a tir nghal.
LADC a CEM Pu Manghmunga Chinzah chuan kangmei tuarte a tawrhpui thu sawiin, LADC Sorkar chuan chhawmdawlna awmthei ang angte a ngaihtuah tur thu The Lawngtlai Post a hrilh a, CEM hian kangtuarte chu chhungkaw khat ah Rs 10,000/- pek a nihtur thu leh Adviser to CEM chu a hmun ah a tir nghal.
Lawngtlai West bialtu MLA, Pu C.Ngunlianchunga chuan kang tuarte a tawrhpui thu a sawi a, MLA hian kangtuarte mamawh hmasa tur eitur leh tul pawimawhte nen naktuk zing hian T.Dumzau hi a pan dawn.
Lawngtlai Bazar Branch YLA chuan mutbu, thawmhnaw leh Buhfai leh chawhmeh lam chi thahnem tak nen T.Dumzau hi vawiin chawhnu khan an pan nghal.
T.Dumzau hi In 70 vel awmna niin, kang thelh tur hian khaw thenawm Zochachhuah, Dumzautlang Model, Hmawngbuchhuah leh Laitlang mipui te an thawk chhuak nghal a, khawpum a kang tur chu harsa takin an thelhmit thei ta a ni
Central YLA chuan kang tuarte chhawmdawlna tur a lakhawm mek a, naktuk hian Central YLA hruaitute chuan tanpui leh chhawmdawl hna thawkturin T.Dumzau hi an pan ang
Tags
News