Myanmar buaina vanga inhumhimna zawnga rawnlutte CYLA in a chhawmdawl zel dawn

 

      Myanmar ram a Sipai in thuneihna a pawnglak vanga mipui tawrhna nasatak thleng mek an duhloh leh demna lantir nan nimin tlai khan Lawngtlai ah Central YLA buatsaihin Sit-in-Demonstration neih a ni.

  Areopagi a mipui tamtak pungkhawm hma ah Central YLA President Pu HC Vanlalruatpuia chuan, Myanmar rama Sipai chetna chu natakin Central YLA chuan a dem tih sawiin, mipuite tawrhna chu an tawrhpui takzet tih a sawi a. Myanmar ram buaina vanga raltlante chu Central YLA chuan an lo lawm tih sawiin, englaimahin a ensan dawn lo a, Central Sorkar in raltlante a lo tuamhlawmlo a nih pawhin Central YLA chuan a tuamhlawm zel dawn a ni a ti.

He hun ah hian LADC a CEM Pu Manghmunga Chinzah pawhin thusawiin, Myanmar ram a mipui tawrhna chu Council Sorkar chuan a tawrhpui tih sawiin, mahni sahimna zawnga LADC huamchhunga rawnlut te chu theihtawp chhuahin ngaihsak an ni ang a ti.

Nimin a Lawngtlai a Myanmar rama Civil Disobediance Movement thlawpna lantirna ah hian Lai Women Association President Pu H.Vanlalhruaii pawhin LWA chu raltlante chhawmdawl turin an inpeih reng thu a sawi..

Lawngtlai a Sit-in-Demonstration neihna ah hian mipuiten Myanmar rama sipai rorelna leh tharum thawhna an dem thu ziak a an ken bak ah, mipui rorelna tundin thuai an duhthu te an aupui bawk.