Mizoram district khawpui zawng zawngah khawii nge i tlawh chak loh ber ti se, 'Lawngtlai' tiin ka chhang maithei! A chhan chu ka kal hmasak khan khaw khawro tak, khu si, fai si lo niin ka hmu a. Kal nawn leh ka chak lo tlat a ni.
Lunglei khawpuiah MJA Conference a awm dawn tih kan hriat hnuah Kolasib MJA Committee-in, Lunglei kan kal rau rau chuan tunlaia hmun hmingthang Beino/Bawinu (Lungmak) hmun te tlawh nghal tum ila ti-a kan sawiho avangin, Lawngtlai chu kan kal ngei dawn tih ka hre mai a. Vawi khat chiah ka la hmuh Lawngtlai khawpuiah chuan kan va riak ta nge nge a ni.
MJA Conference kalho vek kan ni a, Lunglei atangin Lawngtlai district MJA member-te nen Lawngtlai khawpui kan pan ho a. A nachang hre takin Lawngtlai Press Club-ah, keini ang bawka Lungmak hmuh tuma kal ve tho Mamit District MJA member-te nen Lawngtlai MJA-te hian min lo hmuakin, zanriah min lo buatsaih sak a. Lawngtlai DC Pu Andrew H. Vanlaldika leh DIPRO C. Lalhruaitluanga te chu dam lohna leh hna thil avangin rawn lang thei lo mah se, kan tan an inpe tih kan hria. Kan lawm takzet.
Lawngtlai atanga hla lo tê, Zochachhuah bula Zorinpui Land Custom Station dinna tura kawng sial mek - Kolodyne Multi-modal Transport Transit Project (KMMTTP) hnathawh kan en bawk a. Helaia hnathawktu India ram company RK-RPP (Joint venture) thawktute chuan min lo dawngsawng \ha ngang mai a. RK-RPP hotupa (Project Coordinator) Indian Army Captain hlui TS Negi hovin min lo dawngsawng a, kan hriat duh min hrilhin, ei tur tuihnai tak min lo chhawp bawk.
RK-RPP-te hian Burma ram lam kawngpui an khawih a. An hna hi kum 2020 February thla tir a\ang khan thawk \anin, kum hnih chhunga thawh zawh tura ruahman ni mah se, hripui leng avangin duh angin hna a chak thei lo va. Kum 2023-ah chuan zawh theih an inbeisei thu Capt TS Negi hian a sawi a. Mizoram lam, Lawngtlai leh Zorinpui inkar, RDS Pvt Ltd leh ARSS-Atlanta Jt Venture-ten KMMTTP hnuaia kawngpui an laih zauh mek, lei (bridge) an dawh mek te enin, an zawh hunah chuan helai bial hian an chhawr nasa dawn tih a lang reng mai.
Hemi hmun a\ang hian Lawngtlai MJA hotute kaihhruainain Castle of Beino lam chu Sumo-in kan pan ta vang vang a. Pan vang vang han tih hian, kawngpui mam nuam takah kan tlan vang vang emaw ti suh - kawngpui sial pawp, enkawl leh lem lohah kan tlan bep bep hi a ni ber mai a. Hetiang hmun lar leh hmingthang tak pawhtu kawngpui te hi chu han chei that deuh ni se aw!
Chhimtuipui lui hi Mara lam chuan 'Beino' an ti a, Lai lamin 'Bawinu' an ti thung a. A awmzia chu a inang reng a, 'Lalnu' tihna ve ve a ni awm e. Chu Beino/Bawinu (Lui) ah chuan lungpui lian tak tak a awm a. Meilawng an tih mai, lawng lian ang taka ding to lurh mai hualvelah chuan lung lian lo zawk dang a awm thluah a. Chulai tak chu 'Castle of Beino' an tih lai chu a ni.
Chumi awmna hmun, Lungmak an tih bawk, tunhnaia a thlalak mawi tak tak hmuh tur awm mek chu kan pan vang vang a. Ngengpuitlang a\angin Hruitezawl kan pan a, khaw ropui tak a ni lo ve ve a. Mahse, kan hmuh châk, dingdihlipa kan thlir panna kawnga khaw awm a nih avangin lungchim takin chùng khuate chu kan thlir ngawih ngawih a. Naupang bal paw thing theng, Covid-19 hripui a leng mek tih pawh hre ve lo ni awm taka hmai tuam pakhat mah hmuh tur awm lohna khuaa zalen taka an lo infiam phar phar hmuh te chu nun tithawvengtu a tling.
Mizoram chhim lam hmanlai Lalram pahnih awma Lalram pakhat zawka lal fapa hmel \ha tak Hniara chanchin, a nu leh pa ten lalram pakhat zawka lal fanu naupang zâwk, hmel \ha tak neih tir an tum laia lal thlah ni lo, mi pangngai chhungkuaa mi fanu hmel tha turu - Pawkhaidi a neih tak dan te; Hniara leh Dii-ten an damlai par an hman chulna hmun, Meilawng Lungpui, Castle of Beino, Mara hovin 'Saphao Lopano' an tih bawk chu mit ngeiin kan han hmu ve ta a. Lungmak Lungpui lian pui pui inkara lawngleng hmanga han tawlh luh laia rilru chhungrila a thawh dan (feeling) sawi thiam hleihtheih loh kha aw!
Tuipui (Chhimtuipui) li dam dup maia Meilawng leh lungmak hmun pana kan tlan chhoh laia, lawng tikal tura an khawl hman, Burma hovin Japan ram atanga an lak luh tih hriat fahran mai, khawl panga 'Yamabusi' tih inziak ngei mai ri chho hem hem te, lungpui pahnih inkara kan tleng zel zel laia lawng khawl (engine) thangkhâwk ri thlerh thlerh te kha bengah hian a cham veng veng a. Lui tui tlemna lai, lui chhuat lung khawkrawk tak tak hmuh theihna laia tui luang ri a rin bîk riau laia - Lui luang laiah pawh a thûk laiah chuan thâwm a reh dak mai a, a pawnlang erawh a ri ring hawr hawr hlê mai! Mihring pawh hi a pawnlang apiang mai hi social media thleng hian kan ri vak vak a, mi thûk leh ril apiang an thâwm a zawi mai em ni? - tih mai mai ka ngaihtuah lai te kha ka la hre reng nia!
Keini lungmak en duh mai mai, an tana hlâwkna tur pakhat mah awm miah lo tih chiang sa kha Lawngtlai MJA-te khan khual tha thlenin min lo thleng a. Min lo chiauau a, min lo dawngsawng a ni satliah lo - khual zahawm cheiin min lo chei a nia! A zahthlâk lek lekin ka hria.
Lunglei khawpuiah Conference hmangin an rawn lehlang a, Lawngtlai lam kan pan phei rual leh a. Zin haw chauh pawh sawi lovin an Press Club-ah zanriah min buatsaih sak a, kan riahna tur min lo tihfel sak a, a tûk lama kan kalna tur Sumo leh lawngleng thlengin min lo buaipui a. 'Heti hi a ni a, kan tifel viau e, in kal thei mai ang chu maw..' tiin min thlah se, Sumo driver khan min hruai thleng ang a, min hruai kîr leh mai ang. Mahse, zin hah ve tho an nih pawh sawi lovin, a tûkah hma takah an tho a, nilengin, keimahni vangin lirthei chungah, kawng chhe takah, darkar kua vel an han insawh leh a nia! Keimahni avanga an bonus dawn kha an tan a va hlâwk lo dawn tak êm aw!
Kolasib District khaw langsar Bilkhawthlir-a piang leh seilian, Lawngtlai lama inbeng bel a, MJA President hial va ni mek Pu Mangheta te, Che sâp zaih mai Pu Elvis-a te, Mizo pa tha eltiang a ni tih hriat fahran Pu |hianga leh Pa rinawm leh dam dup mai Pu Sena te inpêkna anga nasa dawngtu zinga ka tel thei kha ka vannei a. Mi dang tana ka inpêkna chîm chin ka ngaihtuah lêt a, ka zak chem chem hial a ni. An lakah hian kan va ba nasa êm! Kolasib lamah rawn zin ve rawh se, kan ba hi kan rulh loh atakah Pu Taka!