Lai Autonomous District Council a MDC pali, kumin September 9 a Congress Party chhuahsantute chu nimin khan MNF Vice President Pu Lal- thleng liana'n Aizawl ah a lawmlut.
LADC a sorkarna chelhtu Congress Legislature Party an zawmna, nikum 2019 May 25 a titawp a, MNF MDC te nen LADC a United Legislature Party dintu zing a mi, Congress Ticket vek a thlan tlin, Paithar Bialtu MDC, Pu V.Zirsanga, Vengpui Bialtu Pu VL Hmuaka, Sekulh bialtu Pu Lallawmsanga Apetow leh Sangau South bialtu Pu ST Laldialova te chuan Congress Legislature Party an zawmna an tihtawp hnu ah, kumin September ni 9 khan Congress Party atanga an banna Lai District Congress Committee President hnen ah an thehluh a, hemi hnu, tunthla ni 12 khan LADC a Chairman nilai, Congress atanga bangta Pu V.Zirsanga chuan LADC a Chairman a nihna a bansan zui ve leh a, heng MDC pali te hi nimin khan MNF Party ah lawmluh an ni ta a ni.
LADC Sorkar dinglai Term hi kumin December ni 4 khian a tawp tawh dawn a, State Election Commission chuan Council inthlanna neih a nihtheihnan inbuatsaihna a kalpui mek a, hetihlai hian tunthla ni 16 khan LADC a sorkarna chelhmektu Congress Legislature Party te chuan BJP Legislature Party an din thu Deputy Chairman hnen ah an thehlut a, hunremchang hmasaber ah Union Minister in BJP ah hian a lawmlut dawn niin an sawi. Seat 25 awmna Kum 2015 a LADC Inthlanpui neih ah Congress Candidate 16 thlantlin an ni a, MNF in bial riat changin, Independent pakhat thlantlin a ni a, tun dinhmun ah nimin a MNF Party zawmta MDC pali te nen MNF chuan MDC 12 an nei mek a, Congress lam atang hian MDC engzatinnge BJP zawm tih chuan puanzarna mumaltak a la awmloh vangin hriattheih a la nilo.