Lai Autonomous District Council a Congress Legislature Party, Member paruk te chuan vawiin khan CEM hnen ah BJP Legislature Party an thlawp theihloh thu an thehlut a, an zing a LADC Sorkar a nihna pawimawh nei, Executive Member 3 leh Town Committee Chairman leh Deputy Chief Whip te chuan an nihna atanga an banna CEM hnen ah hian an thehlut nghal.
Hemi hnu hian Lawngtlai Bazar a Lai District Congress Committee Office ah thuthar lakhawmtute kawmnghalin, Congress Legislature Party Leader Pu C.Sangchhunga chuan, BJP ah an luhve theihloh thu sawiin, amah bak ah, Diltlang bialtu MDC, Pu Laltlawmlova Chinzah, Tuithumhnar bialtu MDC Pu KC Malsawmdawngliana, M,Kawnpui bialtu Pi N.Sangnawni leh Nominated Member pahnih Pu H.Lalramdinhluna leh Pi Rualthanchingi te chu Congress Legislature Party ah an la awm tih a sawi.
Chanchinbumite zawhna chhangin Lai District Congress Committee President Pu J.Ropianga Chinzah leh Lawngtlai West bialtu MLA, Pu C.Ngunlianchunga te chuan, LADC a Congress MDC ten BJP Sorkar an dinna tur ah Congress Party nen ruahmanna siam engmah an neilo tih an sawi. Inthlanpui neihtur ah pawh tun dinhmun ah BJP an thawhhopui theihloh vangin, thawhdunna neih theih a nilovang an ti.
Congress hruaitute chuan, Council in hmasawnna duhawm zawk a neihtheih nan BJP nen inremsiamna rintlak a awmloh thu an sawi a, Direct Funding pawh thu puarpawleng hmanga inthlem lunglenna mai a an ngaihtu sawiin Parliamentary Standing Committee berin, a theihloh a tih tawh vangin, beisei tur a awmlo a ni an ti.
Tags
News