LADC a Nominated Member palite vawiin khan Chairman in MDC atan a lalut.

Vawiin khan Lai Autonomous District Council a, Nominated MDC pali te chu LADC Chairman Pu C.Lalmuanthanga'n rinawmna tiamtirin MDC atan a lalut.

Tunhnaia Mizoram Governor in LADC a Nominated Member atan a rawn pawm,  

Pu CL. Zothanga  , Lawngtlai-III.
Pu JH. Thangliana  , Lawngtlai Vengpui.
Pi Lalnunchami Ralte  , Lawngtlai-III. leh 
Pi Zodinpuii  , Lawngtlai Council Veng te chu Central YLA Golden Jubilee Hall ah MDC atan lakluh niin, LADC a Chief Executive Member Pu C.Lalsawmzuala chuan LADC Sorkar fuke kima a kalthei ta chu lawmawm a tih thu sawiin, Mizoram Governor leh State Sorkar in LADC Sorkar an ngaihsak thinna ah lawmthu a sawi a, CEM chuan he ram lo chu ramdang kan neilova, duat leh hmangaih taka enkawl a ngaia, a bikin MDC te chungah mawhphurhna a innghat lian hle a, tanrualna atangin ram chuan hmalam a pan zel ang a ti.

Tuna LADC a Chief Executive Member Pu C.Lalsawmzuala hi kumin January 27 khan CEM atan lakluh a ni a, hun engemawchen Nominated Member  neih a nihloh hnu ah, Nominated MDC palite chu lakluh an ni ta a, nikum 2025 December 3 a LADC Inthlanpui neih ah khan MNF chuan Seat riat lain, Indian National Congress in Seat sarih an changa, ZPM in Seat 6 la in, BJP leh Independent Candidate ten Seat hnih ve ve an chang a, Independent atanga tling pakhat chuan a hnuah Congress zawmin, tun dinhmun ah Sorkar intawm siamtu MNF leh Congress chuan MDC pariat ve ve an nei.

LADC ah hian mipui thlan Member 25 awmin, heng bakah hian Nominated Member pali an awm tel bawk.