Pu C.Lalmuanthanga, Chairman, LADC chuan Autonomous District Council chhungchang, tunhnaia Chief Minister in Siaha a asawi chu, nimin Thawhtanni a Lai DCC Office ah thusawiin a chhang.
1. HLAWH 100% HMAN LEH GODOWN CHUNGCHANG:
Pu C. Lalmuanthanga, Chairman, LADC chuan, "LADC hian an pawisa dawn zawng zawng 100% hi hnathawktute hlawh atan an hmang fai vek, engtinnge an changkan theih ang? Kudam pakhat enkawl turin Group D panga an dah an ti a ni" CM in atih chu, "Hei hi thudik lo hulhual a ni Pu C.Lalmuanthanga chuan a ti a, LADC hian 100% sum a hmuh hi 100% thawktu hlawh atan a hmang lo. Felfai takin kum 10 chhung atana hlawha sen ral hi data fel tak kan nei a, a duh chuan kan pe thei. Tunah hian 93.09% chauh hlawh atan kan hmang mek a ni. Tin, LADC hian Godown enkawl lai a nei lo hrim hrim tih hi kan CM hian lo hre teh se," a ti.
2. SUM PUK LEH PEKBELH CHUNGCHANG:
Chairman chuan, "Mizoram Finance Commission-in sum a ruahman sak bak a, in pek belh ngaihna a awm lo / pek belh thei an ni lo" tih chungchanga CM thusawi chu, "A pek belh duh leh duh loh chu CM, Finance changtu a ni a, a thu a ni. Amaherawhchu, thil theih loh a ni lo. Congress sorkar lai khan 1st Mizoram Finance Commission hman tan a ni a, 0 atanga hman tan a ni a, 1st MFC-ah khan earmarked sa a nih reng laiin, LADC sum indaihlohna kha khati hunlaia sorkar khan R.E. Rs. 1999.85 lakh Salary Sector-ah kum 2018 leh 2019 ah khan min pe a, a nakum Financial Year 2019 leh 2020 ah pawh Rs. 596.89 lakh Salary Sector atan bawk R.E. min pe a ni.
Plan leh Non-plan anga sum kan dawn hun chhung kum 7 chhung hian State Sorkar atangin Development works kan tih Non-plan Sector hi figure ngai rengin pung miah lovin State Sorkar hian min enkawl a ni. Salary Sector erawh loh theih lohna - annual increment, promotion, pay upgradation, DA pung etc. avang hian kum tin a pung thung a. Chutiang a nih avang chuan Salary Sector hi a pung lo thei lo a ni. Chutiangte a nih avang chuan kum 2024 Financial Year-ah keimahni ruahmanna in khan Non-Salary bikah kum 7 chhung Rs. 1233.00 lakh ni thin chu Rs. 1300.00 lakh a tihpun a ni zawk a ni. Heng zawng zawngah hian Development works atana sum dah Sorkar hnathawk hlawh atana in hmang min ti hi chu thudik lo hulhual a ni tih Lairam mipuite hian i hria ang u," a ti.
3. COMMON SERVICE RULES CHUNGCHANGAH:
Chairman chuan, "Common Service Rules kan siam sak mek a" tih chungchanga CM thusawi chu, "State Government hian ADC-te tan Common Service Rules a siam ngawt thei lo. Para 2(6) of Sixth Schedule chuan District Council / Regional Council-te inrelbawlna hmasa ber tur atan Rules a siam thei ang tiin a sawi a; clause (h)-ah chuan, chu Rules chuan officer leh staff rawih dan tur leh an service chungchang pawh a huam ang tih a sawi.
Hei hi ADC-te an awm tan tirh leh thuneihna inthlak hun lai vel a mumal taka an kal theih nana Governor mawhphurhna a sawina a ni. Para 2(6)(h) tlawhchhanin Governor chuan kum 1992-ah The Lai, Mara and Chakma District Councils Recruitment Rules, 1992 a lo siam tawh a ni.
Tichuan, Para 2(7) chuan, Governor-in ADC-te inrelbawl theih nana Rules a siam hnuah, ADC-te chuan, Governor phalna lain, anmahniin Sub-Para (6)-a sawi hote chungchangah Rules thar an insiam thei ang tiin a sawi. Proviso to Para 2(7) hian chiang lehzualin a sawi a, 'ADC ten Rules an siam hma chu, Governor Rules siam chu hman tur a ni' tiin.
Chumi awmzia chu ADC ten anmahniin service chungchangah Dan an insiam tur a ni a, an insiam hmaa lo hman lailawk tur Governor-in a siam sak ang tihna a ni. Tichuan, LADC chuan kum 2014-ah The Lai Autonomous District Council Recruitment Rules, 2014 a keimahniin kan siam ve ta a, Rule No. 9 hmangin 1992-a Governor Dan siam chu a luahlan ta a ni. Hna lak leh hnathawkte enkawl chungchanga Dan siam hi ADC-te thuneihna liau liau a ni," a ti.
4. ANTI-DEFECTION LAW CHUNGCHANGAH:
Chairman chuan, "Anti-defection law hi LADC chuan a duh a, a hmang reng thin. Mahse, 10th Schedule-ah chauh a hman theih avangin 6th Schedule-a awm ten kan hmang thei lo a ni. He dan hi State Government tih theih a ni lo, Parliament-in Sixth Schedule a siam that hma loh chuan tih theih a ni lo. Chuvangin, Constitution (125th Amendment) Bill, 2019-ah ADC ten defection avanga member-te ban theihna dan siam theihna hi dah a ni a, tunah pass a la ni lo mai chauh a ni.
He dan min paih sak tirtu tak mai chu, tuna ZPM-a awm mek, Ex-MDC nitate leh MDC nilai mekte ngei kha an ni a, mahni party mawng inhlimna mai a ni. Anmahni an ban mai hlauhthawn avangin LADC innghahna leh rorelna ngelnghetna tur Anti-defection law chu an lo khing a. Vawiin niah ZPM Sorkar-ah an lut a, Sorkar tha leh kalphung fel an sawi a, an party mawng an hlim a, LADC Sorkar erawh defection avanga a keh chhiat theihna tur kawng an lo hawnsak diam tawh a ni. Hei hi mahni pumpui chauh ngaihtuahna, LADC mipui ngaihtuah lohna, politics tenawm ber a ni," a ti.
HPC NEN KAN DANGLAMNA:
Chairman chuan, "Hmar People Convention-te chu Mizoram Sawrkar Agreement-na hnuaia awmte tluk leka min ngaih hi a dik lo hle a ni. Keini LADC leh ADC dangte hi Centre Sawrkarin duat taka India Constitution hnuaia Autonomy mahnia rorelna kalpui tura duhsak taka a pek liau liau kan ni e.
Kan hnam dan, khua leh tui District Council huamchhunga awmte enkawlna hi kan thuneihna dik tak a ni. State Sawrkar hnuaia Department pakhat ang chauha treatment min pek a tum hi hnam anga inzahlohna lian tak a ni," a ti.