Hmeichhe naupang kum 6 Tuihawk in a la a, vanduaithlak takin a boral.

Nimin tlai dar 5 vela ruah nasa taka sur avang khan tuihawk luankawr a tui chaktaka luang chuan Lawngtlai College Veng a mi, Ruby Lalrinsiami kum 6 chu metre 300 vel a len a, vanduaithlak takin a thi.

Nimin Zirtawpni tlai dar 5 vel a ruah nasa taka asur laiin, Ruby Lalrinsiami kum 6 leh a thiannu Alicya Remruatkimi te chu an thenawm hnaia Dawrah thil lei turin an kal a, kawngsir a Tuihawk luankawr, tui chak taka luangah Ruby i chuan a ke a zuk chiah chu tuihawk chuan a la ta a, a thiannu chuan umzui mahse tui a chak avangin a umpha lova, in lama Ruby pa hrilhin, Ruby Pa Pu Lalbawlliana leh a thianpa chuan theihtawpa umzuiin, tuihawk luankawr mumal lohna leh hnimin a bawh vek hmun chu mihring tana kalna chi anih loh avangin an hel a, Ruby ruang chu lengkir hnuai tuitlingah an zuk hmu ta ani.

Ruby Lalrinsiami hi Alpha English Medium, College Veng.Lawngtlai ah Kg 2 zirlai a ni a, vawiin khan a ruang hi District Hospital ah endik a ni a, vawiin vek khan College Veng thlanmualah vuiliam ani.

Ruby Lalrinsiami chetsualna chu Lawngtlai DC Pu Donny Lalruatsanga chuan pawi atih thu sawiin,a kalsan a chungte a tawrhpui thu leh Sawrkar atanga tih theih awm te a tul anga buaipui anih  thu The Lawngtlai Post a hrilh.