Vawiin khan Lawngtlai Police ten tunlai thiamna hmanga Phone bo an hmuhlette a neitute hnen ah an hlan.
Lawngtlai Police te hian Central Equipment Identity Register (CEIR) hmanga Phone bo chhuina hi kumin Sorkar kumthar atang khan hmangtanin an hnen a Phone bo report 30 zinga 26 chu thla thum chhungin an hmulet a, heng an hmuhlette, a neitu Lawngtlai a awmte chu vawiin khan Officer-in-Charge Lawngtlai Police Station Pu NG Lalchamliana chuan an phone te hi a hlan.
Lawngtlai O.C chuan Sorkarin Police te thuamtha a, hmanraw tha zawk a pek chuan hnathawh a tihawlsam phah tih sawiin, harsatna tawkte chaktaka an tanpui thei chu Police te an lawm hle tih sawiin, Police te chu midang tanpuitu an nih angin harsatna neite englai pawhin Police ah tlulut tura chahin, mipui nen thawhhona thatak hnuaiah theihtawp an chhuahzel tur thu a sawi.
Lawngtlai Police ten Phone bo an hmuhlet zingah hian Uttar Pradesh, West Bengal leh Assam lama hmuhchhuah te pawh a tel.