Bawrhsap hovin Lawngtlai-III leh Electric Veng leitlahniam sawiho ani.

Lawngtlai-III leh Electric Veng huamchhunga leitlakhniam thinna laia hmalakdan tur ngaihtuahin vawiin  khan Lawngtlai Bawrhsap Pu Donny Lalruatsanga hovin Veng pahnih hruaitute an thukhawm

Veng pahniha hruaitute helai leitlahniam hi kum 1995 atanga intan tawh a nih thute, vawi engemawzat leitlahniamin a huamchhunga awmten harsatna an tawh thin thute, thuneitu sang lam atang pawn a theih ang anga hmalakna kalpui thin a nih thu leh, heihian awmzia thuitak a nei thei rihlo ni a an hriat thu te an lo sawi.

Pu Donny Lalruatsanga chuan leitlahniamin a nghawng, Lawngtlai-III leh Electric Veng khawtlang hruaitute nen inrawnkhawmna hlawktak an nei thei chu lawmawm a tih thu sawiin, Sorkar chuan leitlahniam chhan nan ruahmanna SASCI atangin a kalpui mek thu a sawi.

Lawngtlai-III leh Electric Veng khawtlang hruaitute chuan SASCI atanga ruahmanna siam a ni chu lawmawm an tih rualin, helaia harsatna thleng thin sutkianna atan chuan senso tamzawk leh hmalakna thar lian zawk awmthei se an duh thu an sawi a, leitlakhniamna lai kawngpuiah Motor lian zual ritphur tlan tirloh nise, khawpui helna by pass kawng lamah tlan se an duhthu an sawi bawk

Vawiin thutkhawma ngaihdan an neihte , Bawrhsap thuneihna atanga tih mai theihlohte chu Bawrhsap chuan thuneitu sang zawkah a thlen ang.

Lawngtlai-III leh Electirc Veng huamchhungah hian Leitlahniam hian chhungkua 50 dawn a nghawng a, leitlahniam vanga chenna In thiah ngaite pawh kumdangah a lo awm tawh in, kumin ah chuan lei hi a la chetbelh lo niin a hriat a, chemai thei dinhmun ah erawh a dingreng niin a hriat.