Vawiin khan 11th Chakma Autonomous District Council (CADC) - a Chief Executive Member (CEM) thar lakluh inkhawm chu CADC Art & Cultural Hall, Chawngte ah neih a ni a. Pu Pronit Bikash Chakma, Executive Secretary, CADC chuan inkhawm hi kaihruaiin, Lawngtlai bawrhsap Pu Donny Lalruatsanga chuan rinawmna thutiamtirin, BJP hruaitu Pu Nirupam Chakma chu Chief Executive Member atan a lalut.
CEM thar, Pu Nirupam Chakma chuan CADC- a sawrkar mumal leh ngelnghet tak awm tura hma latute, Mizoram Governor, Chief Minister, DCMA changtu Minister leh Chakma Democratic Alliance Legislature Party - te chungah lawmthu a sawi a. CADC - ah huapzo, langtlang leh mipui sawrkar din tura hmalak a nih tur thu a tarlang a. Hmasawnna kawng hrang hrang- Zirna, Kawlphetha, kawngpui tha, thalaite tana hna thar siam leh a dangte ngaihpawimawh a nih tur thu a sawi .
DC & MA Minister Pu C. Lalsawivunga chuan rei tak Governor's Rule - a an awm hnua, CADC - ah sawrkar thar lakluh a ni chu lawmawm a tih thu a sawi a. Governor leh Chief Minister - te hmalakna fakawm a tih thu sawiin, Chakma Democratic Alliance Legislature Party chuan CADC tan hmasawnna thar a thlen a beisei tlat tih a sawi a. Hmasawnna tluantling, mipuite innghahna leh mipui sawrkar ni zel tura sawrkar thar chahin, mipuite duhsakna a hlan nghal a ni.
CADC- ah hian Elected Seat - 20 awmin, Chakma Democratic Alliance Legislature Party - ah hian BJP- 10 leh ZPM - 9, infinkhawmin sawrkarna hi an siam.
Tags
News