Hri vangin District Magistrate in Myanmar atangin Bawng leh Lawi lakluh a khap.

Thenawm ram Myanmar ah Lawi leh Bawng pulhri a leng ni a hriat vangin Lawngtlai District Magistrate Pu Donny Lalruatsanga chuan Myanmar atangin Lawi leh Bawng phurluh, kaihluh a khapa, he khapna hi Lawngtlai District ah he pulhri a darh loh nan a chhuah a ni tih District Magistarte chuan a sawi.

Tunlai hian kan thenawm ram Myanmar ah bawng/lawi pul hri a leng mek nia thu dawn a ni a. Chuvangin Lawngtlai District chhungah kan ran vulhte a lo him zawk theih nan, ramdang atanga Bawng leh Lawi lakluh hi khap tula hriat a ni.

Khapna thupek hi Section 165 of Bharatiya Nagarik Suraksha Sanhita (BNSS), 2023 in thuneihna a pek hmangin District Magistrate chuan a chhuah a, thupek zawm lo chu Section 223 of Bharatiya Nyaya Sanhita (BNS) hmangin hrem theih an ni,

Lawi leh Bawng pulhri chungchangah hian The Lawngtlai Post zawhna chhangin District Veterinary Officer Dr. Charlie C.Chawngthu chuan he ran natna hi China lam atanga rawnlut, Myanmar a darh ta ni a an hriatthu a sawi a, Bawng leh Lawi te chu an Ke leh an Ka chhung a na a,  Foot, and Mouth Disease ti a hriat niin, tuntuma he natna hri leng mek hi a hmalama hetiang natna hrileng nen inang viau mahse, a venna damdawi erawh a hran a ngai niin a sawi a, DVO chuan he natna a darh loh nan a bikin Ran hmanga sumdawngte  District Magistrate thupek thataka zawmturin a chah.