Zanin khan Dr. Lorrain Lalpekliana Chinzah, MLA & Adviser to CM chuan Chakma hnam kutpui ber Biju Miloni chu Khuallian niin, Kut hawngin a hmanpui.
He kut lawmna pui ber hi Longpuighat Mual ah neih a ni a, Dr. Lorraina, MLA chuan Ribbon chep chatin Kut hi hawngin, Kut Organising Chairman Pu Rashik Mohan Chakma, MLA chuan Chakma te kut pui ber lawmna a telte Kut chibai bukin Khuallian Dr. Lorraina chu hun hlu tak senga an sawmna ngaipawimawh a telpui thei chu lawmthu a hrilh.
Dr. Lorrain, Chief Guest chuan Kut a hawn hnuin Stall hrang hrang tlawhin Cultural items hrang hrang leh zai te ngaihthlak ani bawk.
Dr. Lorraina Lalpekliana Chinzah chuan India rama cheng hnam hrang hrang ten ziarang chi hrang hrang kan nei theuh a, Kan pi leh Pu te hunlai atanga hman thin Kut chi hrang hrang kan nei bawk a, heng kan hnamzia rang chi hrang hrang kan neih te zingah Kut te hi pawimawh hle tiin, Chakma te Kut ropui ber Biju Milloni Kut hmang tura sawm a ni chu lawmawm a tih thu a sawi a, India Constitution duangtu ten India ram chu Pangpar huan mawi tak, Pangpar rawng chi hrang hrang, rim chi hrang hrang leh hnah chi hrang hrang, mahni awmna a mawi taka par thin nen a tehkhin angin Mizoram pawh hnam chi hrang hrang awmkhawmna kan ni a, Pang, Bawm, Lusei, Hmar, Paihte, Lai, Mara, Chakma, Bru te nen kan awm pawlh nual a, heng hnam hrang hrang te hi mahni awmna hmun theuh ah Mizoram ti mawitu leh ti nuamtu nih tum theuh ila, midang te harsatna nilovin tanpuitu nih i tum theuh ang u, a ti.
Dr. Lorraina chuan hnam ziarang lanna diktak chu kan tawng, kan incheina, kan Kut, kan pi-pu te tihdan vawn nun a ni a, hemi kawnga hian hnam tin leh chi tin in nasa takin tan lak angai a, heng kan hnam nihna pholang tute hi a bo hun huna chuan kan hnam pawh a bo nghal dawn ti i hre theuh ang u, tiin kalkhawm te a chah.
He Biju kut lawmna ah Mizoram chhung leh pawn atangin mikhual thahnem tak bakah CADC area atangin MDC te, CADC Officials te, CADC area chhunga YCA leh NGOs hrang hrang te an fuankhawm a, Mipui sang telin he Biju nikhatna hi an chhim ani.
Biju Kût hi Ni 3 chhung hmang tura ruahhman ani a, Opening Programme hi Dr. Lorraina MLA in a hmanpui a, Naktuk ah Pi Prova Chakma, MLA in a hmanpui anga, a kharna chu Pu Rashik Mohan Chakma in Khuallian niin a hmanpui dawn ani.
Dr. Lorraina hi Pu LR. Dingliana, ZPM MDC, Pu V.Zathanga, Ex. MDC ZPM, Pu Lallawmsanga Apetaw, Ex MDC, ZPM, Pu Lalchhanhima Pautu, ZPM Secretary ten an tawiawm.