Kangmei Ven Hlawhtlin Nan Tanrual A Ngai.

Kum tin Feb 15 atanga April 15 chhung hi Mizoram Sawrkarin Kangmei Ven Hun a puang thin. Chhan nei lovin a puang lo - kan ramngaw kan hloh nasa tawh a, nunna chan hial pawh a awm fo tawh.

Mizoram Forest Department report in a tarlan danin, nikum 2025 chhung khan kangmei chhuah vawi 300 chuang a awm a, ramngaw hectare sing chuang a kangral. A chhan lian ber chu lo hal sual, mei kawng siam lo, meizial bung paih leh ramhnuai a mei chhem mit loh vang a ni.

Kangmei ven hi Forest Department leh Fire Service mawhphurhna chauh a ni lo. VC, YLA, kohhran, zirlai pawl leh chhungkaw tin mawhphurhna a ni. “Ka lo a ni lo” ti a inthiar fihlim theih a ni lo, thli in mei a chhem phei chuan a tuar tu kan ni vek dawn.

Kangmei a chhuah lohnan tangrual ila,  School naupangte zirtirna pe ila. Pastor leh kohhran upa ten Pathian thilsiam humhalh a pawimawh zia pulpit atangin sawi se.

Ramvak leh picnic na ah mei chhem chuan ti mit fai ila. Meizial  bung hmet mit lovin paih lo ila. Naupang mei khawih tir lo ang u.

Ramngaw a kan chuan thing leh mau chauh a kangral lo - savawm, sakhi, sava te chenna kan tihchhiat sak a, kan lui tui hna a kang chat a, kan boruak a bawlhhlawh a, a tawpah kan fate chan tur kan khawh ral tihna a ni.  Thufing chuan “Mihring kan tam poh leh kan mawhphurhna a sang” a ti. 

Kan pi leh pute’n min rochun ramngaw hi kan tu leh fate hnena kan hlan chhawn ve leh a ngai.Chuvangin,   kangmei ven ah hian Ka mawh a ni ti theuh  ang u.