Vawiin khan CMO Conference hall Lawngtlai ah National Tobacco Control Programme, Lawngtlai District bultumin Police Officer te pual in “Training of Law Enforcers for Police Officers appointed for enforcemen/implementation of PECA, 2019 under Lawngtlai District” buatsaih a ni a.
Dr. Lalmuanawma Jongte Chief Medical Officer & District Nodal Officer NTCP chuan hun kaihruaiin kal khawmte lawmna a nei a, second hand smoke hlauhawmna leh second hand smoke lak a mipui te venhim a pawimawh thu a sawi a, Police uniform hi mipui ten an zah a, enforcement ken kawh kawngah pawh hmalakna a chak thin thu a tarlang a ni.
Dr. Zoramthangi Renthlei Addl. Director (D) DHME, Health & Family Welfare Department & State Nodal Officer, NTCP chuan India ram chu Zuk leh Hmuam uarna ram a nih thu leh Mizoram pawh zuk leh hmuam ti nasa tehna ah pahnihna kan ni mek thu a sawi a, Zuk leh hmuam ti lo zingah pawh natna hlauhawm tak tak vei an awm thin thu sawiin mihring hi mi vannei, vanduai leh a laihawl kan awm a, a laihawl hi mi nawlpui kan ni a, kan ei leh in leh nunphung a zir a van duaina tawk thei kan ni, fimkhur taka in ven a pawimawh thu a sawi. Zuk leh hmuam mizo ten kan bansan theih na tura kan hmalakna kawng hrang hranga kan thawhpui pawimawh tak chu Police te an nih thu sawiin hmalam hunah thawh ho na tha zawk nei zel turin kal khawm Police te a sawm.
PC. Lalchunglura, MPS Seperintendent of Police Lawngtlai District chuan Khawvel changkanna hian kan lifestyle ah thil thar a rawn ti chhuak thin a, e-Cigarette te pawh khawvel changkanna in a rawn kentel pakhat, kan mimal, kan taksa, kan hriselna, kan ram leh hnam tan a thil thalo khap ngai lo chhuak a ni a. Kan thalai kan tu leh fate leh vaihlo la hmang ve lo te vaihlo leh a kaihhnawih hrang hrang lak a veng him turin nasa zawka kan dan te enforce turin kalkhawm Police te a chah.
Zir ho na ah hian Lawngtlai District chhunga Police Station hrang hrang leh outpost atanga Police kalkhawm te an tel a, Pi Vanlalzari State Legal Consultant, NTCP chuan PECA 2019 & COTPA 2003 chungchang leh kalkhawm te hriattur pawimawh a zirtir a. R Lalremruata State Consultant, NTCP chuan lawmthu sawi in hun a ti tawp ani.