.jpg)
December 9, 2025 ah LADC Inthlanpui Result chhiar a ni a, Result hriat atangin thlakhat chuang a liam ta a, Sorkar erawh a la piang theilova, Politics buai leh engemaw neuh neuh chu vawi engemawzat thleng tawh mahse, Sorkar piang mumal theilo hian ram hmel a tibal tih a chianga, tunge mawhpuhtur tih chu tute pawn an hriatthiam phak leh an rindan nen an chhuizawn nasa khawp ang.
Tute emaw Sorkar se, tute emaw Sorkar lose tih ngaihtuahna atang nilovin, Ram leh hnam zahawmna humhim duhte tan chuan LADC a Sorkar a piang mailo hi veitham a tling a, Sorkarna siam tum a Governor hnen a thlen hmasaber ZPM leh MNF inkawp khan kumhlui December 15 ah Sorkarna an siamtheih thu an thlen a, a siamtir theitu lam atangin siamtir a nilova, chhantha tak erawh a awm ah ngai ila.
Tunah MNF leh Congress inkawpin Zirtawpni, January 9, 2026 khan Sorkar an siamtheih thu Governor ah an thlen ve thunga, engtak ang zel ang maw?
LADC a awmna chhan hi Laifate vang a ni tih a chianga, LADC a mumalloh hian Laifate chauh nilovin, Laifate thlazar hnuaia awm, LADC huamchhunga mite nen, kan vaiin kan hmel a bal thin a, tute emaw siamthat biktura ram hi dah ngawt chi a nilova, kan vaia mawhphurhna a ni tih pawm ila, heivang hian alawm, Candidate tur siam, Vote zawn leh Vote thlakte hi ram siam nan bul tanna tangkai a nih thu sawi a nih fo thin ni.
Nawr chiama fel thei chi a awm a, ngawirenga nghah chi pawh a awm, tun ang renga thil a kal chuan LADC dinhmun ah hian aw chhuah thei ten hun an tih hun erawh a la thlengin a rinawm a, Sorkar hi a nih ang angin a siamthei ten siam phawt sela, a hnulam erawh thuneitute kutah Sorkar kaldanin a zir nganglo a nih chuan thuitak a innghat dawn a, a bultanna tur ber pawh tan hleithei lova awm ngawt hi chu a fuhlo takzet.