Mizoram hi Lirnghing natak tuarthei dinhmuna ding niin mithiam ten an sawi a, Lirnghing thleng thut tase, chhiatna dang a thlen belhloh nan te, chhanchhuah hna thawktu leh Tlawmngai pawl bakah mipui lam pawn an tihtur leh tihlohturte an hriat nan, vawiin khan chetlakdan a tak ang thei berin tihchhian a ni.
District Disaster Management Authority, Lawngtlai bultumin, Lawngtlai DC Pu Donny Lalruatsanga kaihhruaina hnuaiah Earthquake Mock Exercise hi vawiin chawhma dar 9:30 atang khan Bazar Veng leh Chandmary inrinna lai, kum kaltaa Inchimna lai bawr ah neih a ni a, Lir nataka nghing vangin Inchim a awm nuala, College Bus pawh Inchim hian a delh a, heng Inchim leh Bus a chuangte chhanchhuah hna hi a tak angthei ang ber in tih chhin a ni.
Mock Exercise neih ah hian a tlangpuia thlirin, chhanchhuahna thawktute leh chhanchhuahte lo enkawlzui dante, vanduaina dang a thlen belhloh nan a hmalatute chetdan a felfai viauin a hriat.
Chhiatna thlenna hmunhi rangtakin Police ten thutchilhin, hmunhim lamah mipui leh lirtheite sawnchhuah niin, Lirthei tlandan pawh rangtakin Traffic Police ten an ruahman nghala, QRT leh Medical lam te rangtakin a hmunah thlengin, chhanchhuah hmasak apiangte Damdawi lam thiam ten an enkawl nghal zung zung a, PHE Department leh Power & Electricity Department lam pawn chhiatna thlenna hmun hi thleng nghalin an tihtur te thatakin an thawk a, Fire & Emergency Service ten an thutchilh reng bawk.
Heng mawhphurhna hrang hrang neite chetveldan hi thineitu lam ten ngun takin an vilreng bawk.