Hun engemawchen zangnadawmna buai vanga laihtlang theihloh, Lawngtlai leh Lunglei inkar kawng laihmek chu vawiin khan Lawngtlai Bawrhsap Pu Donny Lalruatsanga'n a hmunah a tlawh.
Lawngtlai luhdawn, Thingkah dai a kawngpui laih zauh hna hi kumhlui October thla laihawl atang khan ṭan niin, hnathawktute chuan kumin March thla ral hmain a nihdan turangin kawng hi siam zawh hman an inbeisei tih Lawngtlai Bawrhsap hi an hrilh a, Pu Donny Lalruatsanga chuan hnathawktute chu theihtawp chhuaha ṭan la tura hrilhin, fur thlen hmaa hna mumal taka zofel turin a chah.
Helai kawng hi hunreitak ram neitute leh thuneitute inkarah Zangnadawmna buai vangin laihtlang lovin dah a ni a, Lawngtlai Bawrhsap chuan ram neitu leh kawng laitute kawmin inremna a siampui hnu ah kawng laihzauh hna hi thawh a ni ta a ni.
Tun dinhmun ah kawng laihzauh hna hi a nihdantur angin laihzawh a ni tep tawh a, heivang hian Lirthei kalvel pawh kawng danpin leh hawn hun a awm tawhloh vangin harsatna a awm tawhlo.
Lawngtlai Bawrhsap hi NHIDCL hotuten lo dawnhsawngin, DIPRO Pu Zonunchama Ralte leh Thuthar thehdarhtu thenkhat ten an tawiawm.