Lawngtlai District MJA ten, Lawngtlai District kaltlanga India leh Myanmar sumdawnna kalmek chu, ram leh mipui himna ngaihtuah chungin awmzenei zawka kalpui an duh.
MJA Lawngtlai District te chuan vawiin khan Lawngtlai Press Club ah Annual.Conference hmangin, chawhma lam rorelah, India leh Myanmar a bikin Rakhine State nen sumtawnna kalmek chu Sorkarin awmzenei zawkin kalpui se an duh thu Resolution siamin an passed.
MJA Lawngtlai Annual Conference hmanpuitu, Lawngtlai Bawrhsap Pu Donny Lalruatsanga chuan, Journalist te khawvel chu a zauva, ramri a neilova, chi leh hnam a neilova, tawp chin a neilova, Journalist te chu kawng engkim ah midang aiin an thawhhlawk tih sawiin, Journalist te chu theihtawp chhuah a tanla fat fat turin a chah a, Ruihhlo vanga tawrhna a nasa a, helam hawia hmalakna pawh theihtawp chhuah a kalpui a ni tih sawiin, Lawngtlai District chuan awmzeneia hmalam panturin theihna a nei a, chu a theihna chu haichhuah tul a tih thu a sawi bawk.
Lawngtlai Bawrhsap chuan MJA Lawngtlai District ten Sorkar hmalakna an tawiawm tha hle tih sawiin, chhunzawmzel turin a sawm bawk.
MJA Lawngtlai District Annual Conference ah hian LADC a I&PRO, Pu C.Lawmsangzuala'n kum 2026 - 2028 chhunga District MJA hruaitutur thlanna neihpuiin, President atan Pu Elvis Lalthangzuala, Vice President atan Pu H.Lalrinmawia, Treasurer atan Pu Lalngheta Ralte an thlang.
Vawiin Annual Conference ah hian MJA Member, National Integrated Forum of Artists and Activists (NIFAA) chawimawina dawngtu Pu Elvis Lalthangzuala,District MJA in lawmpuina an hlan bawk