Vawiin khan Lawngtlai ah World Blood Donor day 2026 CEM hova hman niin, Lawngtlai Pastor Bial KTP ten thisen Unit 31 an pe.
Lawngtlai Bazar Veng Presbyterian Kohhran Sunday School Hall a World Blood Donors Day hmanna a khuallian Pu C. Lalsawmzuala, CEM. LADC chuan Mihring kan damchhunga kan thiltih tamtak zinga inchhir awm loh ber chu thisen pek hi ani tih sawiin, midangten nunna an neih theihna tura thisen pe thinte hi khawvel hriatah puang zar chuaih chuaih lo mahsela, Pathian nena inzawmna a awm tlatna hian thisen pek hlutzia a tarlang ani ati.
CEM chuan kumina kan thupui One Drop of Humanity, Give Blood, Save Lives tih anih ang hian, kan mihringpuite lakah hmangaihna leh lainatna nen, thisen pe ila, nun i chhanhim ang u ati
Lawngtlaia World Blood Donors Day hmanna programme hi Tv. C. Lalhmachhuana. Information Secretary, AVBD, Lawngtlai chuan kaihruaiin, Dr. Lalramzauva‘n hunserh a hmang a, Nl. Lalramsangi. Committee Member, AVBD kaihhruaina in thisen pek uar zel tura intiamna neih a ni a, Pu Elvis Lalthangzuala, President AVBD. Lawngtlai leh Pu Alden. H. Laldinzuala, Leader. Lawngtlai Pastor Bial KTP ten thu an sawi a, 2025 thisen pe tam Kohhran Thalai pawl leh Pawl hrang hrangte hnenah chawimawina thuziak hlan an ni
Report a tarlan anih dan chuan Kum 2025 chhung khan Blood Donation Camp vawi 45 neih a ni a. Voluntary a thisen dawn Unit 1178 niin, thisen dawn zawng zawng hi Unit 1459 ani a. Heng Blood Bank a thisen dawn te hi Lawngtlai a Hospital pathumah an mamawh anga pek chhuah thin ani.
World Blood Donor Day denchhen hian Lawngtlai Pastor Bial KTP ten a mamawh apiangte hman atan thisen an pe a, thisen pe te hi mipa 22 leh hmeichhia 9 niin, thisen unit 31 an pe.