Bawrhsap Award vangin Lawngtlai khawpuiin hma a sawn chho mek.

Lawngtlai Bawrhsap Pu Donny Lalruatsanga thahnemngaihna vanga Lawngtlai khawpuiin kawng hrang hranga hma a sawn theih nan, khawpui chhunga Veng 12 te tana inelna buatsaih, Bawrhsap Award vangin Lawngtlai khawpui hmel a danglam chho tan

Kumtina chhunzawm tura ruahman, Bawrhsap Award bultanna hi kum kalta November atang khan hmalak tan a ni a,  Lawngtlai khawpuia Veng 12 ten an  huamchhung ah faina beihpui thlakin, kawngpui kam leh Tuihawk luankawr te an thianfai a, veng mipuite hnen ah Vantlang Tlangau kaltlangin, mahni In leh a vel vawngfaia, awmzenei zawka an lirthei leh   hmanrua te dah turin an ngen bawk.

Bawrhsap Award hian Veng fai leh inenkawlna tha, Ran khuahkhirh leh Lirhei dahdan mumal te, nunphung tha inzirtirna leh midang tana hnawksak lo, zahawmtaka nunhona vawngtha te chu ngaihpawimawh hmasak a ni dawn a, kumtinin Republic Day ah Award hi hlan thin tura ruahman niin lawmman thatawktak siam a ni dawn.

Bawrhsap Award- dawngtu tur endik  turin Mizoram Journalist Association (MJA) Lawngtlai District ruat an ni a, an ni hian thlatinin Veng hrang hranga hmalakna endikin, tun dinhmun ah Lawngtlai khawpui hmel a danglam chhoh mek thu MJA hruaitute chuan an sawi.