LADC Inthlanpuiah tluang takin mipui ten Vote an thlak. Hriattheih chinah Vote 83.99 % a tla.

State Election Commission ruahmanna hnuai ah Lai Autonomous District Council Inthlanpui ah boruak nuam tak hnuaiah zalen takin mipui ten vawiin khan Vote an thlak a, hriattheih chin ah  Vote  83.99  % a tla.

Tukin zing dar 7 atangin LADC huamchhunga MDC bial 25 a Polling Station 111 ah te tluangtak in Vote thlak a ni a, khawi hmun atang mahin inthlan tikhaihlak zawnga tualchhung a tanga boruak duhawmlo hriattur a awmloh laiin, Lungtian-II Polling Station a First Polling Officer Pu Israel MS Dawngliana, kum 43 Lawngtlai Council Veng chu tukin khan a mu kaihthawh zawh a ni lova, Pu Israel MS Dawngliana hi LADC a Planning & Programme Implementaion Department a LDC niin, vawiin khan a ruang hi Lawngtlai panpui a ni, 

District Election Officer Pu Donny Lalruatsanga chuan Pu Israel MS Dawngliana'n vanduaithlak taka chatuanram a pan chu pawi a tih thu sawiin, a chhungte leh a kalsante Lalpan thlamuan se a duh thu sawiin, chhawmdawlna awmthei ang ang ngaihtuah a nih tur thu a sawi a, Lungtian-II, Polling Station ah pawh Inthlanna tluang takin kalpui zui a ni a ti.

Boruak nuamtak hnuaiah mipui ten Vote an thlak theih nan Central Young Lai Assiciation ruahmanna in Branch YLA te an huamchhung theuhah boruak duhamwlo thleng palh thei veng leh Vote thlaktur tanpuingaite tanpuiin an duty a, Lawngtlai khawpui chhunga Polling Station hrang hrangte MPF hruaitute tlahwin, District Election Officer bakah Election Observer pathum Dr.Andrew H.Vanlaldika, Pu Lalhmansanga leh Pu Abraham Beirazi Khithie ten  ngun takin an vil bawk.

Bial 25 awmna LADC ah Vote nei 56,873 awmin  Candidate 80 an awm a, , ZPM chuan bial awm zawng zawng bial 25 an chuhkim a, MNF in bial 20 ah Candidate neiin, Congress in bial 14 ah Candidate an nei a, BJP in bial 10 Candidate neiin Independent a chuh mi 11 an awm bawk.

Inthlanna buaipuituten vawiin tlai atang khan Inthlanna na hmanrua te Lawngtlai panpui  nghalin, Government Lawngtlai College a Pindan awmkhauh ah venhimna khauhtak hnuaiah Inthlanna hmanruate hi dahluh niin, December 9, karleh Thawhlehni zing dar 8 atangin Inthlanna a Vote tlate hi chhiar a ni ang.