Lawngtlai District, Kakichhuaha tui hri ni a hriat lenmekna chu Lawngtlai Bawrhsap chuan vawiin khan a hmunah a tlawh a, hmalakna hrang hrang leh an dinhmun tlangpui a enfiah.
Pu Donny Lalruatsanga chuan VCP leh khawtual miin an lo hmuahnaah lawmthu a sawi a. Hri leng mek vanga nunna chân paruk ( Refugee- 3, Khawtualmi- 3 ) lai an awm chu pawi a tih thu sawiin, hrileng darh lo tura chak taka hmalak chhunzawm zel a nih thu a sawi a. Bawrhsap chuan 'Containment Area ' a puan a nih tawh angin, dan leh thupek zawm kawngah thuawih taka awm turin a chah a. Tun dinhmunah Myanmar lam nen inkalpawh chu thla hnih chhung atan khap tlat a ni a, in lenpawh pawh khap tlat a nih angin tha taka zawm a pawimawh hle a ti. Sumdawng emaw thildang vanga ramri pela kal lui an awm a nih chuan na taka hremna pek an nih tur thu tarlangin, VC, YLA leh LWA - te chu tha taka lo venpui turin a sawm nghal a ni.
Pu Donny Lalruatsanga chuan inenkawlna kawngah mamawh zualpui ORS, I.V Drip leh a tul dangte pek chhunzawm zel an nih tur thu a sawi a. Medical Team- ten an thutchilh reng a, thlaphang lo tur leh an thu lo zawm tha turin a chah a. Hri kai leh vei awmdan chu thla khat chhung uluk taka vil chhunzawm reng a ni ang a ti. December ni 1 ah LADC inthlan tura Polling party- te an lo kal tawh dawn avangin, thupek zawma, inenkawlna tha nei tur a khaw mipuite tan la thar turin a ngen a. Faina leh thianghlimna ngaipawimawh a, 'containment area' a puan pawh hlih thuai a nih theih nan a thahnem ngai taka thawhpui turin a sawm nghal a. Bawrhsap chuan khawtlang hruaituten an ngen angin, ei leh in bakah damdawi lam a mamawh an neihte pek a nih tur thu a tarlang nghal bawk.
Dr. Malsawmtluanga, Medical Officer, District Hospital Lawngtlai pawhin tuiin tur chu chhuan so hnu chsuh in tur leh ei leh in siam nan a hmang thin turin a chah a. Pem leh hliam neite chu fimkhur zual tur leh faina leh thianghlimna kawngah tan la thar turin a chah a ni. Abik takin tui hmanna zawng zawngah tui chhuanso chauh hmang zel turin a chahin, Health Worker leh Medical Team - ten an thutchilh angin, tha taka enkawl chhunzawm zel an nih tur thu a sawi.
Pu. Laltlanchhuaha, Kakichhuah VCP chuan Bawrhsap- in a hmun ngeia a lo tlawh thei chu lawmawm a tih thu a sawi a. Hri leng mek a Bawrhsap hmalaknaah khawtlang hmingin lawmthu a sawi a ni. Hri a darh zel lohna turin inkalpawh leh in len pawh kawngah chak taka hmalak a nih tur thu sawiin, faina leh thianghlimna kawngah theihtawp an chhuah tur thu a sawi bawk a ni.
Pu ZD Vanlalhruaia, Health Worker, chuan Report tawi pe in. November ni 11 atang khan Medial Team -ten an awmchilh tawh thu a sawi a.Hri vei mi 90 buaipui tawh an ni ati. VC leh NGO - ten an thawhpui tha hle tih sawiin, in lenpawh kawngah tan lak a la ngai hle a ti a. Hri vei tam ber chu ek In nei mumal lo an nih thu a sawi a,faina leh thianghlimna kawngah inzirtirna tha taka neih a nih thu a tarlang bawk. Thi tam ber chu damdawi eitha lo an nih thu tarlangin, tun dinhmunah mi pali enkawl mek an awm a ni, a ti.
Kakichhuah hi In - 130 awmna khua niin, November ni 4, 2025 khan tui hri ni a hriat vangin mipakhat a thi a, hri vang hian mi 6 thi tawhin , hri hi Salachhuah, Myanmar atanga rawnlut ni a ngaih a ni.
Tags
News