Lai Autonomous District Council, Chief Executive Member atan M.Kawnpui bialtu Pu N.Zangura chu vawiin khan Additional DC Lawngtlai Pu David Lalrinawma'n, LADC Hall, Lawngtlai ah rinawmna thu tiamtirin a lalut.
CEM lakluhna inkhawm, LADC a Exeutive Secretary Pu K.Lalthanzara kaihhruaiah hian CEM thar Pu N.Zangura chuan 11th LADC Term ah hun harsa tak tak an tawk thin tih sawiin, hunpawimawh ah ram hruaihna thawktura achunga mawhphurhna tla chu lawmawm a tihrualin amah chauh chuan hmachhawn ngaihna a awmlo tih sawiin, LADC a a Member puite, hnathawktute, Kohhran leh khawtlang hruaitute leh ram mipuite thawhpuiah sawmin, LADC tan ngaihtuahna sengthar leh a, ngaihpawimawh an neihte ahnenah thlena, finchhuah thin turin a sawm.
United Democratic Alliance hruaitu Pu N.Zangura chuan a chanpual tak engmah a beiseiloh tur thu sawiin, pawisa chu diktaka hman a nih chuan ram mipuiten engemaw zawng talin an tangkaipui ngei a beisei thu a sawi a, LADC hnuaia thawkte leh a Sorkara a thahwpuite pawh sum thianghlimlo laka inthiarfihlim ngam turin a a chah.
Pu N.Zangura hian a thawhpuitur Executive Member atan mi pakua
Pu Sanghuliana Mualchin, MDC, Lungtian
Pu C.Rongura, MDC, Vathuampui
Pu C.Lalsawmzuala, MDC Chandmary, Lawngtlai
Pu Andrew Laltlanzara, MDC, Chawngte 'P'
Pu Lalropuia Chinzah, MDC Bazar Veng, Lawngtlai
Pu L.Daniala, MDC, Bualpui Ng East
Pu C.Hrangthianga, MDC College Veng, Lawngtlai
Pu HC Lalthawmliana, MDC, Diltlang South
leh Pu H.Lalmuansanga MDC, Tuithumhnar te a ruat nghal.
Tun dinhmun ah LADC ah hian Elected Member 25 ah MNF-11, BJP-2 leh pawnlam atanga thlawptu Congress Member 1 nen United Democratic Alliance chuan Member 14 neiin, ZPM in Member 11 an nei mek.
Vawiin a CEM atan lakluhtak Pu N.Zangura hi BJP, MDC niin, tun LADC Term kallai ah hian MNF, Congress, ZPM leh BJP ten CEM dinhmun an luah tawh.
Tags
News