Lai Autonomous District Council, Chief Executive Member atan M.Kawnpui bialtu MDC, BJP hruaitu, United Democratic Alliance ten an hruaitu atan an thlan Pu N.Zangura, Governor in a ruatna chu vawiin khan DC&MA Departrment chuan a tichhuak.
Nimin khan ZPM hruaitu, CEM nilai Pu V.Zirsanga chu House ah thlawptu a neihdan fiah a nih dawn ah CEM atanga banna a thehluh vangin LADC a ZPM Sorkar chu a tlu a, Pu V.Zirsanga banna hi Governor in a pawm hnu ah UDA hruaitu Pu N.Zangura chu CEM atan a pawmzui a, Pu N.Zangura hian thlawptu a neihdan August 19, 2025 ah fiahtura tih a ni.
Pu V.Zirsanga chu February 27, 2025 khan CEM atan lakluh a ni a, hemi hnu hian Member thlawptu a neih ngah tawklo tih UDA lam chuan Governor ah thlenin, Governor chuan tuna CEM atana a ruat Pu N.Zangura chu May 8, 2025 khan CEM atan a ruata, Pu V.Zirsanga chuan CEM atanga paih a nihdan ah dan palzutna a awm ni a hriain High Court ah a kala, Court thuremna angin Pu V.Zirsanga chu Floor Test nei tura tih niin May 8, 2025 a Pu N.Zangura CEM atan ruatna chu a hnawl.
He thu kalzel ah hian nimin khan Pu V.Zirsanga dinhmun fiahtura LADC Session koh a nimahse, CEM in banna a thehluh hnuah ZPM Sorkar dinglai a tlu a, vawiin khan UDA hruaitu Pu N.Zangura, CEM atan ruatna hi tihchhuah a ni zui ta a ni.
Tun dinhmun ah LADC ah Mipui ten an thlan Member 25 ah MNF-11, BJP-2 leh pawnlam atanga thlawptu Congress Member 1 nen UDA chuan Member 14 neiin, ZPM in Member 11 an nei mek.
Tags
News